Türkmenabatda «Bir bar eken, bir ýok eken» atly bäsleşigiň şäher tapgyry geçirildi
Türkmenabat şäherindäki 4-nji çagalar bakja-bagynda welaýat baş bilim müdirliginiň guramagynda «Bir bar eken, bir ýok eken» atly bäsleşigiň şäher tapgyry geçirildi. Oňa şäheriň dürli çagalar bakja-baglarynda terbiýelenilýän körpeler gatnaşdy.
Bäsleşigiň maksady — ertekileriň üsti bilen çagalaryň Watana, ata-enä hormat duýgusyny ösdürmek, halk döredijiligine we däp-dessurlara bolan buýsanjyny artdyrmak, şeýle-de sözleýiş dilini we çeper gürrüň etmek ukybyny ösdürmekdir.
Oýun we çykyşlar iki etapda alnyp baryldy. Ilkinji etapda körpeler labyzly gürrüň berip, ertekileriň mazmunyny we gahrymanlarynyň häsiýetlerini açyp görkezdiler. Soňra zehinli körpeler ertekileri sahnalaşdyrmak boýunça bäsleşdiler. Bu etapda hem olaryň taýýarlyk derejesi we sahnada özüni alyp barlyşy, dilewarlygy synanyldy.
Bäsleşigiň jemleri boýunça:
-
1-nji orny – 47-nji çagalar bakja-bagynyň körpeleri eýelediler.
-
2-nji orny – 51-nji çagalar bakja-bagynyň körpeleri eýelediler.
-
3-nji orny – 64-nji çagalar bakja-bagynyň körpeleri eýelediler.
Bäsleşigiň ýeňijilerine guramaçylar tarapyndan ýadygärlik sowgatlary gowşuryldy.
