Hindistonda yo‘tal siropini ichgan 20 dan ortiq bola vafot etdi
Hindistonda yo‘tal uchun mo‘ljallangan siropni ichgan 20 dan ortiq bola vafot etdi. Yana kamida besh nafar bola og‘ir ahvolda kasalxonada. Ayni paytda bu xavfli siropni sotish taqiqlangan.
Reuters axborot agentligi xabariga ko‘ra, vafot etgan bolalar Coldrif nomli yo‘tal siropini ichgan. Ushbu dori mahalliy Sresan Pharmaceutical Manufacturer kompaniyasi tomonidan ishlab chiqarilgan.
Laboratoriya tahlillari sirop tarkibida zaharli dietilen glikol moddasi mavjudligini ko‘rsatdi. Ushbu modda ruxsat etilgan miqdordan 500 barobar ko‘p bo‘lgan.
2-oktabr kuni xavfli moddaning mavjudligi tasdiqlangach, siropni sotish rasman taqiqlandi. Sirop bolalarda o‘tkir buyrak yetishmovchiligiga olib kelgan.
Xuddi shu zaharli modda Respifresh va RELIFE nomli boshqa siroplarda ham aniqlangan. Hindiston sog‘liqni saqlash rasmiylari aholiga bu dori vositalarini ishlatmaslikni tavsiya qilgan.
Dietilen glikol nima?
Dietilen glikol — hidsiz, rangsiz va shirindan ta'mga ega suyuqlik bo‘lib, asosan sanoat maqsadlarida qo‘llaniladi. Bu modda inson salomatligi uchun juda xavfli hisoblanadi. Zaharli ta’sir natijasida:
-
Buyrak yetishmovchiligi,
-
Asab tizimi buzilishlari,
-
Hatto o‘lim holatlari ham sodir bo‘lishi mumkin, ayniqsa bolalarda.
Zaharlanish alomatlari ko‘pincha darhol sezilmaydi. Odamlar o‘zini yaxshi his qilishi mumkin, ammo organizmga zarar yetmoqda. Aksariyat hollarda yordam kechikkan bo‘ladi.
JSST bayonoti
Jahon sog‘liqni saqlash tashkiloti (JSST) voqealardan so‘ng Hindistonda ichki bozorda sotilayotgan dorilar sifat nazoratida "me’yoriy bo‘shliq" mavjudligini ta’kidladi.
JSST ma’lumotiga ko‘ra, bu zaharli siroplar rasman eksport qilinmagan, biroq noqonuniy yoki ruxsatsiz yetkazib berish ehtimoli istisno qilinmaydi.
