Mask Tesla Roadster haqida yangi tafsilotlarni aytdi
Tesla bosh direktori Ilon Mask 31-oktabr kuni Jo Rogan podkastining mehmoni bo‘ldi. Uchrashuv uch soat davom etdi, Tesla haqida uncha ko‘p gap bo‘lmadi, biroq boshlovchi yangi Roadster chiqishi haqida so‘raganda, Mask bu fikrni tasdiqladi va Tesla yangilangan modelni taqdim etishga yaqinlashayotganini aytdi.
Tesla yillar davomida Roadster haqidagi e’lonlar bilan jamoatchilikni qiziqtirib keldi, biroq ishlab chiqishni kechiktirib, uning imkoniyatlarini inson tasavvuridan ham oshirishga harakat qildi. Joriy yil boshida kompaniya Roadster uchun “eng epik shou” o‘tkazishni va’da qilgan edi, unda ilgari ma’lum bo‘lgan hamda mutlaqo yangi texnologiyalar namoyish etiladi. Ammo hanuzcha hech kim aniq nimalarni kutish kerakligini bilmaydi.
“Menimcha, bu voqea tarixdagi eng esda qolarli mahsulot taqdimoti bo‘lishi mumkin. [Taqdimot] umid qilamanki, yil oxirigacha bo‘ladi. Biz hamma narsa mukammal ishlayotganiga ishonch hosil qilishimiz kerak. Bu mashinada juda aqldan ozdiradigan texnologiyalar mavjud. Shunday deyman: agar siz barcha Jeyms Bond avtomobillarini birlashtirsangiz ham, bizning g‘oyamiz ulardan ham aqldan ozdiruvchi,” — dedi Mask.
Mask, Tesla yil oxirigacha Roadster namoyishini o‘tkazish niyatida ekanini yana bir bor tasdiqladi.
U avvalroq yangi avlod Tesla Roadster 100 km/soat tezlikka bir soniyadan kamroq vaqtda chiqishini, siqilgan havo asosidagi reaktiv tezlatkichlarga, kichik qanotlarga va reaktiv samolyotlardagidek boshqaruv shturvaliga ega bo‘lishini aytgan edi.
