Serdar Berdimuhamedov Portugaliya Respublikasining Prezidenti bilan uchrashdi
Amerika Qo‘shma Shtatlariga ish safari doirasida Turkmaniston Prezidenti Serdar Berdimuhamedov Portugaliya Respublikasi Prezidenti Marselo Rebelo de Souza bilan uchrashdi.
Ta’kidlanishicha, Turkmaniston va Portugaliya Respublikasi teng huquqlilik va o‘zaro hurmat tamoyillariga asoslangan do‘stona munosabatlarga ega. Suhbatdoshlari ikki davlat o‘rtasidagi hamkorlikni rivojlantirish va mustahkamlash uchun keng imkoniyatlar mavjudligini qayd etdilar. Turkmaniston va Portugaliya bir-birlarining samarali xalqaro tashabbuslarini doimiy ravishda qo‘llab-quvvatlaydi hamda Birlashgan Millatlar Tashkiloti doirasida ushbu tashabbuslarning mualliflari sifatida ishtirok etadi.
Shu munosabat bilan Davlat Rahbari Turkmaniston tashabbusi bilan va BMT Bosh Assambleyasining qaroriga muvofiq, 2025-yil “Xalqaro tinchlik va ishonch yili” deb e’lon qilinganini, bu voqea mamlakatimiz doimiy betarafligining sharafli 30 yilligi bilan bog‘liq ekanini ta’kidladi. Prezident Marselo Rebelo de Souzani shu yilning 12-dekabrida Ashxobodda o‘tkaziladigan xalqaro forumda ishtirok etishga taklif qildi.
Do‘st mamlakat Prezidenti taklif uchun minnatdorchilik bildirib, Turkmanistonning betaraflikka asoslangan ijobiy tinchlikparvar tashqi siyosati dunyo hamjamiyatida keng qo‘llab-quvvatlanishini va bu holat mamlakatimizning xalqaro maydondagi obro‘sini mustahkamlashini ta’kidladi.
Uchrashuv so‘ngida hurmatli Prezidentimiz Serdar Berdimuhamedov va Portugaliya Respublikasi Prezidenti Marselo Rebelo de Souza ikki mamlakat do‘st xalqlari manfaatlari yo‘lida samarali davlatlararo munosabatlar yanada rivojlanishiga ishonch bildirishdi hamda bir-birlariga mustahkam sog‘lik va davlat boshqaruvidagi mas’uliyatli ishlarida muvaffaqiyat tilashdi.
