Turkmaniston Prezidenti Qozog‘istonga davlat tashrifi bilan bordi
Turkmaniston Prezidenti Serdar Berdimuhamedov dushanba kuni Qozog‘iston Respublikasiga davlat tashrifi bilan yetib bordi. Bu haqda Turkmanistan gazetasi xabar bermoqda.
Astanadagi xalqaro aeroport Turkmaniston va Qozog‘iston davlat bayroqlari bilan bezatildi va yuksak martabali mehmonni kutib olish uchun faxriy qorovul saf tortdi. Serdar Berdimuhamedovni samolyot trapida Qozog‘iston rasmiylari hamda Turkmaniston hukumat delegatsiyasi a’zolari kutib oldi.
Tashrifning asosiy qismi ertaga, 25 noyabr kuni bo‘lib o‘tadi. Unda Turkmaniston va Qozog‘iston o‘rtasida oliy darajadagi muzokaralar rejalashtirilgan. Uchrashuv yakunida ko‘p qirrali hamkorlikni mustahkamlashga qaratilgan ikki tomonlama hujjatlar paketi imzolanishi kutilmoqda.
Nashrning qayd etishicha, mazkur tashrif ikki davlat o‘rtasida diplomatik aloqalar o‘rnatilganiga 33 yil to‘lgan sana fonida amalga oshirilmoqda. Turkmaniston va Qozog‘iston faol siyosiy muloqot olib bormoqda, turli sohalarda hamkorlikni muvaffaqiyatli rivojlantirmoqda va BMT hamda boshqa xalqaro tashkilotlar doirasida o‘zaro qo‘llab-quvvatlab kelmoqda.
Bu yil Serdar Berdimuhamedovning Qozog‘istonga bu uchinchi tashrifi hisoblanadi. Bungacha u Astanada o‘tkazilgan “Markaziy Osiyo – Italiya” va “Markaziy Osiyo – Xitoy” sammitlarida ishtirok etgan edi.
