Turkmen og‘ir atletikachilari Tehronda o‘tkazilgan 6-Xalqaro “Fajr” kubogida 16 ta medalni qo‘lga kiritdi
Turkmen og‘ir atletikachilari Eron poytaxti Tehronda o‘tkazilgan 6-Xalqaro “Fajr” kubogidan ajoyib natijalar bilan qaytishdi. Bu haqda “Turkmenistan” gazetasi xabar berdi.
7 davlatdan qariyb 40 sportchi ishtirok etgan musobaqada turkmenistonlik og‘ir atletikachilar 10 ta oltin, 1 ta kumush va 5 ta bronza medalga sazovor bo‘lishdi.
Eron, Tojikiston, Shri-Lanka, Afg‘oniston, Saudiya Arabistoni va Iroqning eng kuchli sportchilari qatnashgan musobaqada ayrim vakillarimiz hatto uchta oltin medalni qo‘lga kiritdi. Shulardan biri — 60 kg gacha bo‘lgan eng yengil vazn toifasida chiqish qilgan Seyitjan Mirzayev. U siltab ko‘tarishda 124 kg, itarib ko‘tarishda 150 kg, jami 274 kg natijani qayd etib, uch karra chempion bo‘ldi.
25 yoshli Bunyod Rashidov ham Tehrondan uchta oltin medal bilan qaytdi. U 71 kg vazn toifasida siltab ko‘tarishda 150 kg, itarib ko‘tarishda 165 kg, jami 315 kg natija ko‘rsatdi.
79 kg vazn toifasida G‘ayg‘isiz Toraev itarib ko‘tarishda 187 kg va ikki kurash yig‘indisida 332 kg bilan oltin medalni qo‘lga kiritdi. U siltab ko‘tarishda 145 kg natija bilan bronza oldi.
88 kg vazn toifasida Galkan Rahmanov siltab ko‘tarishda 145 kg bilan uchinchi o‘rinni, Ramazan Toraev esa itarib ko‘tarishda 176 kg bilan uchinchi o‘rinni egalladi. Ikki kurashda Ramazan 316 kg natija bilan Galkandan bir kilogram ko‘proq ko‘tarib, bronza medalini qo‘lga kiritdi. Rustem Annaberdiev 94 kg vazn toifasida siltab ko‘tarishda 160 kg bilan bronza medalini qo‘lga kiritdi.
110 kg vaznda ishtirok etgan Dovranbek Hasanbayev siltab ko‘tarishda 185 kg bilan oltin, itarib ko‘tarishda 202 kg bilan kumush, ikki kurash yig‘indisida 387 kg bilan oltin medalni qo‘lga kiritdi.
Shu tariqa, vatandoshlarimiz musobaqada jami 16 medalga ega bo‘lishdi. Eronlik sportchilar 23 medal olgan bo‘lsada, oltin medal soni bo‘yicha turkmen sportchilardan bir taga kam. Musobaqani uchinchi o‘rinda yakunlagan O‘zbekiston terma jamoasi 5 ta oltin, 8 ta kumush va 2 ta bronza medal bilan ishtirokini yakunladi.
