Ýaşlaryň bähbitleri döwlet syýasatynyň ileri tutulýan ugurlarynyň hatarynda
Türkmenistanda ýaş nesliň ruhy-ahlak, medeni-bilim we beden taýdan ösüşine aýratyn ähmiýet berilýär, olara döwrebap hünärleri öwrenmäge, nazary bilimlerini kämilleşdirmäge, amaly endiklerini ýokarlandyrmaga, sanly tehnologiýalary, täze ylmy ideýalary, öňdebaryjy gözlegleri we tehnologik tejribäni özleşdirmäge ýardam bermek möhüm wezipeleriň hatarynda kesgitlenildi.
Ýurdumyzda ýaşlar syýasatyna Durnukly ösüş maksatlarynyň gazanylmagy bilen baglanyşyklylykda seredilip, milli kanunçylygyň çäklerinde we halkara ýörelgeleri esasynda durmuşa geçirilýär. Häzirki zaman dünýä syýasy, ykdysady we durmuş proseslerinde ýaşlar diňe bir döwletiň däl, eýsem, halkara gatnaşyklaryň hem geljekde uzak möhletleýin ösüşini kesgitleýän strategik serişde bolup durýar.
Döwletiň ýaşlar syýasaty ýaş raýatlaryň bähbitlerini goraýan, ýurduň iň iri jemgyýetçilik birleşigi bolan Türkmenistanyň Magtymguly adyndaky Ýaşlar guramasynyň Merkezi Geňeşiniň işi bilen aýrylmaz baglanyşyklydyr. Guramanyň Merkezi Geňeşiniň resmi saýtynda – onuň işi beýan edilýär, portalyň amatly interfeýsi bolsa zerur maglumatlary aňsatlyk bilen tapmaga mümkinçilik berýär.
Ýaşlar guramasy giň dünýägaraýyşly, berk bedenli, ruhy taýdan sagdyn, zähmetsöýer, Watana wepaly ýaş nesli terbiýelemek boýunça işleri netijeli alyp barýar. Gurama döredilen gününden bäri agzalaryny jebisleşdirmek, olaryň güýjüni, ukybyny we bilimini Garaşsyz Watanymyzy ösdürmäge gönükdirmek boýunça öz öňünde goýan wezipelerini üstünlikli ýerine ýetirýär.
Ýaşlar guramasynyň wekilleri dürli ýurtlarda geçirilýän halkara maslahatlara, forumlara işjeň gatnaşýarlar. Türkmen talyplarynyň okaýan daşary ýurt ýokary okuw mekdeplerine we bilim edaralaryna yzygiderli saparlar amala aşyrylýar, olar bolsa, öz gezeginde, Türkmenistanyň Prezidenti Serdar Berdimuhamedowyň alyp barýan içeri we daşary syýasatyny, milli ruhy gymmatlyklarymyzy wagyz etmekde mynasyp goşant goşýarlar.
Şeýlelikde, döwrüň hakykatlaryny, üçünji müňýyllykda milletiň öňünde durýan beýik wezipeleri nazara almak bilen, bu ugurda üstünlikli durmuşa geçirilýän syýasatyň döwleti hemmetaraplaýyn ösdürmegiň, Watanymyzy has-da öňe, täze belentliklere ilerletmek üçin berk ynsanperwer we işgärler binýadyny üpjün etmäge gönükdirilen esasy maksatnamalaryň biridigini ynam bilen aýtmak bolar.
