Aşgabat we Astana türkmen tebigy gazynyň Gazagystanyň çäginden üstaşyr Hytaýa, Eýrana we Günorta Aziýa ýurtlaryna ibermek mümkinçiliklerini öwrenýärler. Bu barada duşenbe güni “Kazinform” halkara habarlar agentligi habar berdi. Habarda bellenilişine görä, hyzmatdaşlygy giňeltmegiň esasy ugurlary energiýa serişdelerini gaýtadan işlemegi, saklamagy we dolandyrmagy öz içine alýar. Bu ugurlar sebitde umumy energetika giňişligini döretmekde möhüm ädim hasaplanýar. 

Türkmenistan tebigy gaz gorlaryna baý ýurt bolup, bu ugurda sebitdäki hyzmatdaş ýurtlar bilen gatnaşyklaryny ösdürmäge uly ähmiýet berýär. Gazagystan bolsa türkmen tebigy gazyny üstaşyr geçirmek arkaly energiýa üpjünçiliginiň ugurlaryny diwersifikasiýalaşdyrmagy maksat edinýär.

“Türkmengaz” döwlet konserni bilen “QazaqGaz” kompaniýasynyň arasynda tehnologik utgaşyklylygy üpjün etmek we bilelikdäki taslamalara taýýarlamak boýunça işler alnyp barylýar. Gepleşikleriň netijesinde “Galkynyş” gaz käni boýunça “ýol kartasyny” taýýarlamak göz öňünde tutulýar.

“QazaqGaz” — Gazagystanyň milli gaz kompaniýasy bolup, tebigy gazyň çykarylyşy, daşalmagy, saklanylmagy we satuwy bilen meşgullanýar. Şeýle hem kompaniýa ýurduň gaz geçiriji infrastrukturasyny ösdürmek boýunça iş alyp barýar.