Balkandaky bejeriş palçyklaryny we deňiz duzuny gaplaýan kärhanada saglyk ähmiýetli tebigy serişdeler öndürilýär
Türkmenistanyň Saglygy goraýyş we derman senagaty ministrliginiň «Türkmendermansenagat» birleşiginiň Balkan welaýatynyň Balkanabat şäheriniň golaýynda ýerleşýän bejeriş palçyklaryny we deňiz duzuny gaplaýan döwrebap kärhanasynda şu günler tutumly işler amala aşyrlýar.
«Watan» habarlar gepleşiginde habar berlişi ýaly, kärhana üç sany bölümden – bejeriş palçyklaryny, deňiz duzuny gaplaýan we hil barlagy bölümlerinden ybaratdyr. Bölümler öz aralarynda kompýuterler bilen arabaglanyşykdadyr. Bu ýerde Italýa, Türkiýe, Ýaponiýa, Belgiýa, Fransiýa ýaly döwletleriň kämil enjamlary oturdylan.
Mälim bolşy ýaly, Türkmenistanyň tebigaty saglyk ähmiýetli dürli tebigy serişdelere baýdyr. Şolaryň arasynda dürli palçyklar, deňiz duzlary uly orun eýeleýär. Kärhanaň bejeriş palçyklary bölüminde tebigy çeşmelerden getirilen dürli palçyklar, ýöriteleşdirilen elegiň kömegi bilen daş, çäge böleklerinden we beýleki galyndylardan arassalanýar. Soňra ol gerekli derejede garylýar we guýujy ulgama geçirilýär. Bölümiň önümçilik kuwwaty sagatda 600 gap taýýar önüme deňdir.
Deňiz duzuny gaplaýan bölümde bolsa duz ilkinji tapgyrda gerekli möçbere çenli owradylýar, soňra ýöritleşdirilen elekde daş, metal we beýleki galyndylardan arassalanýar. Arassalanan duzuň bir bölegi ýörite basyşyň kömegi bilen gerdejik görnüşine geçirilýär. Gerdejiklere dürli derman otlary goşulýar we olara bejeriş häsiýetleri berilýär.
