Halaç etrabynda Bütindünýä Çagalar güni mynasybeti bilen usuly-amaly maslahat geçirildi
Halaç etrabyndaky 12-nji çagalar bakja-bagynyň binýadynda welaýat Baş bilim müdirliginiň guramagynda «Mekdebe çenli çagalar edaralarynyň bakja toparlarynda usuly işleri kämilleşdirmegiň ýollary» atly usuly-amaly maslahat geçirildi.
Maslahatyň dowamynda mekdebe çenli çagalar edaralarynda usuly işleriň derejesini ýokarlandyrmak, tejribeli terbiýeçileriň iş usullaryny öwrenmek hem-de işgärleriň arasynda tejribe alyşmak meseleleri ara alnyp maslahatlaşyldy. Oňa welaýat boýunça çagalar bakja-baglarynyň terbiýeçileri we usulçylary gatnaşdylar.
Çäräniň çäginde gatnaşyjylar terbiýelenijileriň aýdym-saz çykyşlaryna, şeýle hem etrapdaky mekdebe çenli çagalar edaralarynyň işgärleri tarapyndan taýýarlanan okuw-görkezme esbaplarynyň sergisine gatnaşdylar. Mundan başga-da, bedenterbiýe dersi boýunça görkezme sapak görkezildi.
Maslahatda çykyş eden terbiýeçiler körpeleriň ýaş aýratynlyklaryna görä akyl we beden ösüşini öwrenmegiň hem-de güýçlendirmegiň usullary, şeýle hem okuw-terbiýeçilik işleriniň netijeliligini ýokarlandyrmak meseleleri boýunça maglumat berdiler.
