Ispaniýa: Madrid–Barselona ugry boýunça otlylaryň tizlikleriniň 350 km/sagat ýetirilmegi meýilleşdirilýär
Ispaniýa hökümeti Madrid bilen Barselonany birleşdirýän demir ýol ugruny täzelemek boýunça giň möçberli taslamany başlaýandygyny yglan etdi. Täzeden ýola goýuljak ýokary tizlikli “AVE” ugrunda otlylaryň tizligi 350 km/sagada çenli ýetirilip, ýol wagtynyň iki sagatdan hem az bolmagyna garaşylýar.
Ispaniýanyň transport we durnukly hereket ministri Oskar Puente bu başlangyjyň ýurduň ýokary tizlikli demir ýol ulgamynda täze döwri açýandygyny belläp, häzirki wagtda şeýle tizligi diňe Hytaýyň gazanyp bilýändigini aýtdy. Taslama amala aşandan soň, Ispaniýa maksimal tizlik boýunça dünýäde ikinji orny eýelär.
Häzirki wagtda beýik tizlik üçin demir ýol taýardygyna garamazdan, otlylar köplenç 300–310 km/sagat tizlikde hereket edýär. Ministriň bellemegine görä, ýolagçy sanynyň artmagy, täze operatorlaryň (Ouigo, Iryo) peýda bolmagy netijesinde Madrid–Barselona ugry çakdan aşa ýüklenýär. Ugruň geçirijilik ukybyny ýokarlandyrmak üçin iki ýol bar: täze ýol gurmak ýa-da tizligi ýokarlandyrmak. Hökümet ikinji ugra — tizligi artdyrmaga — üns berdi.
Tizlik ýokarlanandan soň otlylar has ýygy gatnap biler, sebäbi olaryň dolanmak sikli çaltlaşar. Bu bolsa ugry we ýolagçy akymyny ep-esli ýeňilleşdirer.
Täzeleniş taslamasy tapgyrlaýyn ýerine ýetirilip, diňe esasy ýoluň däl, eýsem Madrid bilen Barselonanyň şäherara ugurlarynyň hem döwrebaplaşdyrylmagyny göz öňünde tutýar. Madridde Parla etrabynda täze ýokary tizlikli güýçleniş stansiýasy gurular, Barselonada bolsa La-Sagrera demir ýol düwüniniň ösdürilmegine aýratyn üns berler.
