Aşgabatda durnukly we «akylly» şähergurluşyk strategiýalary ara alnyp maslahatlaşylar
Ak mermerli paýtagtymyz Aşgabadyň durnukly, «akylly» we ählumumy ulgama doly integrirlenen mega-şäher hökmündäki uzak möhletleýin ösüş strategiýasy 2026-njy ýylyň 24 – 25-nji maýynda geçiriljek «Ak şäherim Aşgabat» (WCA 2026) atly XXV köpugurly halkara sergisiniň we maslahatynyň baş ugry bolar.
Bu halkara çäresine dünýäniň 55 döwletinden 650-den gowrak resmi wekiliň hem-de pudaklaýyn hünärmenleriň gatnaşmagyna garaşylýar. Şeýle hem forumyň taslamalaryna şähergurluşyk, düzüm taslamalary, energetika we innowasion gurluşyk tehnologiýalary ulgamynda ýöriteleşen 100-den gowrak daşary ýurtly öňdebaryjy kompaniýalaryň wekilleri gatnaşar. Bu görkezijiler maslahatyň hünär derejesinde we halkara jemgyýetçiliginde uly gyzyklanma eýe bolandygyny tassyklaýar.
«Durnukly, «akylly» we dünýä bilen baglanyşykly paýtagty kemala getirmek» atly strategik plenar mejlisi ýokary wezipeli hökümet wekillerini, halkara guramalaryň hem-de maliýe institutlarynyň wekillerini, maýadarlary, gurluşykçylary, binagärleri we inženerleri bir meýdança jemlär. Mejlisde bitewi düzüm ulgamlary, energiýa tygşytlylygy, sanly transformasiýa, durnukly ulag-logistika infrastrukturalary we şäher ilatynyň ýaşaýyş-durmuş şertleriniň hilini has-da ýokarlandyrmak ýaly wajyp meseleler seljeriler.
Maslahatyň dowamynda «Aşgabat 2045» uzak möhletleýin maksatnamasynyň esasynda paýtagtymyzyň kämil inženerçilik ulgamlary, sanly dolandyryş gurallary we ýokary hilli jemgyýetçilik hyzmatlary bilen üpjün edilen döwrebap dolandyryş, ýokary ykdysady we medeni merkeze öwrülmek prosesini has-da çaltlandyrmak göz öňünde tutulýar.
Halkara forumyň ähmiýeti barada daşary ýurtly diplomatlar we bilermenler hem öz garaýyşlaryny bildirdiler:
Beata Peksa (Ýewropa Bileleşiginiň Türkmenistandaky Adatdan daşary we Doly ygtyýarly ilçisi): — Ýewropa Bileleşigi üçün durnukly şäher ösüşi we «ýaşyl» ykdysadyýet meseleleri elmydama ileri tutulýan ugurlaryň hatarynda durýar. Biz Aşgabady özüniň milli binagärlik aýratynlygyny we gaýtalanmajak keşbini saklamak bilen bir hatarda, döwrebap innowasiýalary şäher gurşawyna üstünlikli utgaşdyrmagyň aýdyň nusgasy hökmünde görýäris.
Irfan Ali (BMG-niň Ilatly ýerler boýunça maksatnamasynyň (UN-Habitat) Gündogar Ýewropa we Merkezi Aziýa boýunça sebit edarasynyň direktory): — Utgaşykly şäher meýilleşdirilişi, sanly transformasiýa we durnukly düzümler dünýä derejesinde integrirlenen çydamly şäherleriň geljegini kesgitleýär. Hakyky ösüş diňe strategiýa, maýa goýum we anyk mehanizmler bir bitewi ulgama birigen wagtynda mümkindir.
«Ak şäherim Aşgabat» (WCA 2026) XXV halkara sergisi we maslahaty köp taraply hyzmatdaşlygy goldap, şähergurluşyk ulgamynda tejribe alyşmaga hem-de sebitde maýa goýum işjeňligini has-da artdyrmaga hyzmat edýän strategik meýdança bolar.
