Magtymguly Pyraga bagyşlanan film — halkara kinofestiwalyň Baş baýragynyň eýesi boldy

Ýaňy-ýakynda Bolgariýanyň Telewideniýe, kino we internet-aragatnaşyk akademiýasynyň guramagynda Sofiýa şäherinde «Славянская сказка» — «Slawýan ertekisi» atly XIII halkara kinofestiwaly ýokary ruhubelentlikde geçirildi. Festiwal çäklerinde ençeme döwletleriň tanymal kinorežissýorlarynyň döreden täze çeper filmleri tomaşaçylara hödürlenildi.

Şol abraýly forumda 2024-nji ýylda döredilen, türkmen we özbek ssenariýaçylarynyň bilelikde edebi esasyny ýazan «Magtymguly Pyragy» atly film hem görkezildi. Bu çeper film özbek kinorežissýory M. Erkinowyň režissýorlygynda surata düşürildi. Kinoda ýurdumyzyň teatr we kino sungatynyň ussatlarynyň çykyş etmegi filme aýratyn ruhy güýç we milli öwüşgin berdi.

Film diňe bir beýik söz ussady Magtymguly Pyragynyň ömrüne we döredijiligine bagyşlanyp çäklenmän, eýsem, slawýan hem-de türki halklaryň arasyndaky medeni hyzmatdaşlygyň çuňlugyny we dowamlylygyny görkezýän eser hökmünde tomaşaçylarda uly täsir galdyrdy.

Netijede, film halkara eminler tarapyndan ýokary baha berlip, «Ýewraziýa giňişliginde halkara medeni gatnaşyklary ösdürmäge hem-de pugtalandyrmaga goşan goşandy» ugry boýunça festiwalyň Baş baýragyna hem-de ýörite Kubogyna mynasyp boldy.

Bu ýeňiş diňe bir döredijilik toparynyň üstünligi bolman, eýsem, türkmen kinematografiýasynyň halkara giňişlikde gazanan nobatdaky üstünlikleriniň biri hökmünde kabul edilýär.