«Zenan — Zeminiň zynaty» atly döredijilik bäsleşigi yglan edildi

Hormatly Prezidentimiz Serdar Berdimuhamedowyň: «Biz ata-enelerimiziň we maşgalanyň mukaddesligini arşa göterýän halkdyrys!» diýen buýsançly sözlerinden ugur alyp, «Garaşsyz, baky Bitarap Türkmenistan — bedew batly at-myradyň mekany» ýyly we beýik Garaşsyzlygymyzyň 35 ýyllygy mynasybetli «Türkmenistan» gazetiniň redaksiýasy Türkmenistanyň Kärdeşler arkalaşyklarynyň Milli merkezi hem-de Zenanlar birleşiginiň Merkezi geňeşi bilen bilelikde ýurdumyzda döredijilik bilen meşgullanýan zenanlaryň arasynda «Zenan — Zeminiň zynaty» atly bäsleşigi yglan edýär.

Döredijilik bäsleşigine hödürlenilýän eserlerde (makalalarda we oçerklerde) degişli ugurlarda amala aşyrylýan giň gerimli işleriň düýp mazmuny we ähmiýeti açylyp görkezilmelidir. Şol sanda ýurdumyzda sekiz we şondan köp çagany dünýä inderip, terbiýeläp ýetişdirýän enelere hormatly adyň dakylýandygy, köp çagaly maşgalalara döwlet tarapyndan berilýän goldaw-hemaýatlar anyk mysallar arkaly beýan edilmelidir.

Makalalardyr oçerkler döwlet we jemgyýetçilik durmuşynda netijeli, yhlasly zähmeti bilen ýaşlara görelde bolýan, köp ýyllaryň dowamynda ýurdumyzyň ösüşlerine mynasyp goşant goşup gelýän döwürdeş zenanlarymyza, uzak ýaşly enelere, milli sungatymyzy, çeper el işlerini ýaşlara öwretmekde tapawutlanýan zenanlara bagyşlanmalydyr.

Bäsleşige gatnaşýanlar hödürleýän işlerini «Zenan — Zeminiň zynaty» atly döredijilik bäsleşigine» diýen ýazgy bilen «Türkmenistan» gazetiniň redaksiýasyna (Aşgabat şäheri, Garaşsyzlyk şaýoly, 100, Erkin döredijilik mekany) ýa-da elektron salgysyna (turkmenistan_gazeti@sanly.tm) ýollap bilerler.

Awtorlar redaksiýa ugradýan eserlerine özleri baradaky maglumatlary (işleýän ýa-da ýaşaýan ýeriniň salgysy, telefon belgisi) hem goşmalydyrlar. Bäsleşige gatnaşýanlar ýaş tapawudy ýa-da işleriniň sany boýunça çäklendirilmeýär.

Bäsleşige hödürlenilýän işler we awtor baradaky maglumatlar bildiriş gazetde çap edilen gününden başlap, şu ýylyň 1-nji martyna çenli guramaçylyk topary tarapyndan hasaba alnar. Bäsleşik Halkara zenanlar güni mynasybetli jemlener.

Ýeňijilere «Türkmenistan» gazetiniň redaksiýasy, Türkmenistanyň Kärdeşler arkalaşyklarynyň Milli merkezi hem-de Zenanlar birleşiginiň Merkezi geňeşi tarapyndan diplomlar we gymmat bahaly sowgatlar, tapawutlanan eserleriň awtorlaryna bolsa höweslendiriji baýraklar gowşurylar.

Habarlaşmak üçin telefon belgisi: 39-95-94