Türkmen talyplarynyň halkara üstünlikleri
Polşa Respublikasynyň Katowise şäherinde Silez uniwersiteti tarapyndan guralan talyplaryň matematika boýunça halkara toparlaýyn olimpiadasynda (International Student Team Competition in Mathematics — ISTCiM) türkmen talyplary uly üstünlik gazandylar. 6–10-njy noýabr aralygynda geçirilen bu abraýly bäsleşikde ýurdumyza wepaly ýaş alymlar jemi 22 medal gazandylar.
Türkmenistanyň wekilleri şahsy hasapda 9 altyn, 8 kümüş we 2 bürünç medala eýe bolup, ýokary netijeleri bilen tapawutlandylar. Şeýle hem toparlaýyn bäsleşikde 2 kümüş we 1 bürünç medal, şeýle-de 2 höweslendiriji baýrak ýurdumyza gelip gowuşdy.
Bu üstünlikleriň arasynda Halkara ynsanperwer ylymlary we ösüş uniwersitetiniň talyplary 5 altyn medal bilen öňe saýlandy. Magtymguly adyndaky Türkmen döwlet uniwersitetiniň wekilleri 3 altyn we 2 kümüş, Oguz han adyndaky Inžener-tehnologiýalar uniwersitetiniň talyplary bolsa altyn, kümüş we bürünç medallaryň hersinden birini gazandylar. Şeýle hem Türkmenistanyň Döwlet energetika instituty 3 kümüş, Türkmen döwlet binagärlik-gurluşyk instituty we Halkara nebit we gaz uniwersiteti bolsa hersi 1 kümüş medal bilen baýrakly orunlary eýelediler. Türkmen oba hojalyk uniwersitetiniň talyby hem bürünç medal bilen ýurdumyzyň abraýyny artdyrdy.
Katowisedäki halkara matematika olimpiadasy dünýäniň dürli ýurtlaryndan — Polşadan, Beýik Britaniýadan, Ispaniýadan, Italiýadan, Awstriýadan, Germaniýadan, Fransiýadan we Türkmenistandan gelen 150-den gowrak zehinli talyby bir ýere jemledi.
Bäsleşik matematiki seljerme, algebra, kombinatorika, geometriýa, ähtimallyk nazaryýeti, funksiýalaryň we differensial deňlemeleriň meseleleri ýaly ugurlar boýunça geçdi.
Türkmen talyplarynyň şeýle üstünlikli çykyşlary olaryň ýokary taýýarlyk derejesini görkezmek bilen bir hatarda, ýurdumyzda ylym-bilim ulgamynda durmuşa geçirilýän giň gerimli özgertmeleriň miwesidigini hem tassyklaýar. Bilim ulgamyny halkara derejä çykarmaga gönükdirilen bu özgertmeler ýurdumyzyň ýaşlarynyň zehinlerini ösdürmäge we dünýä derejesinde bäsdeşlige ukyply nesli kemala getirmäge hyzmat edýär.
Katowisedäki halkara olimpiada diňe bäsleşik däl, eýsem dostluk, tejribe alyşmak we ýaş alymlaryň arasyndaky halkara hyzmatdaşlygy ösdürmek üçin hem ajaýyp mümkinçilik boldy.
Türkmen talyplarynyň gazanan bu ýeňişleri Watanymyzyň bilim ulgamynyň dünýä derejesindäki ösüşini görkezýän ýene bir buýsançly sahypa boldy.
