Ulag-logistika ulgamynda ösüşler
Habarçymyz «Demirýollary» açyk görnüşli paýdarlar jemgyýetiniň 19-njy şahamçasynyň Zerger stansiýasynyň otlulary düzüjisi Muratniýaz Rasulow bilen söhbetdeş boldy. Ol Türkmenistanyň ulag-logistika ulgamynda amala aşyrylýan düýpli özgertmeler barada pikirlerini paýlaşdy.
Muratniýaz Rasulow söhbetdeşlikde milli ulag ulgamynyň kämilleşdirilmeginiň ýurdumyzyň ykdysady ösüşine goşýan goşantlaryny belledi:
— Gadymy Beýik Ýüpek ýolunyň döwrebaplaşdyrylan täze nusgasy ýurdumyzda we sebitde möhüm orny eýeleýär. Täze demirýol ugurlarynyň açylmagy ulag-logistika ulgamynyň has-da kämilleşmegine we döwletara söwda gatnaşyklarynyň giňelmegine ýardam edýär, — diýip, ol aýtdy.
Ol şeýle hem zähmete ýokary baha berilýändigini, döwletiň sylaglarynyň işgärleri täze işlere ruhlandyrýandygyny nygtady:
— 2011-nji ýylda «Türkmenistanyň Garaşsyzlygynyň 20 ýyllygyna» atly ýubileý medaly bilen sylaglandym. Hormatly Prezidentimiziň Permanyna laýyklykda mukaddes Garaşsyzlygymyzyň 34 ýyllyk baýramy mynasybetli maňa Türkmenistanyň «Gaýrat» medaly gowşuryldy. Bu meniň üçin uly ruhlandyryjy täsir boldy we täze zähmet ýeňişlerine itergi berdi, — diýip, Muratniýaz aga sözüni tamamlady.
Söhbetdeşlik döwründe ol häzirki döwürde ulag-logistika ulgamynda alnyp barylýan taslamalaryň, şol sanda täze demirýol ugurlarynyň we Zerger stansiýasyndaky işleriň ähmiýetini nygtady.
