Ashxobodda “Turkmaniston Neft va Gaz – 2025” yubiley forumi bo‘lib o‘tadi
22–24-oktabr kunlari Ashxobod shahrida “Turkmaniston Neft va Gaz – 2025” nomli 30-xalqaro konferensiya va ko‘rgazma bo‘lib o‘tadi. Turkmaniston Xalqaro Axborot Markazi xabar berishicha, tadbirda 45 davlatdan 500 dan ortiq delegat ishtirok etishi kutilmoqda.
Bu yilgi forum yangi ishtirokchilar soni bo‘yicha rekord o‘rnatishi mumkin: 100 dan ortiq yangi delegatlar va 30 dan ziyod xorijiy kompaniyalar Turkmaniston bozoriga ilk bor chiqishni rejalashtirmoqda. Forumda ilk bor yoki uzoq tanaffusdan so‘ng ishtirok etadigan davlatlar qatorida Xitoy, Buyuk Britaniya, AQSh, Qozog‘iston, Germaniya, Rossiya va BAA bor.
Forum doirasida birinchi bor maxsus B2B muzokara zonasi tashkil etiladi, bu yerda mahalliy va xorijiy ishbilarmonlar bevosita uchrashuvlar o‘tkazishadi. Ishtirokchilar uchun TEF App mobil ilovasi ham taqdim etiladi — u orqali forum dasturi va ishtirokchilar haqida ma’lumot olish mumkin bo‘ladi.
OGT 2025 energetika sohasida yangi kelishuvlar, texnologiyalar almashinuvi va xalqaro hamkorlikni kengaytirish uchun muhim maydonga aylanadi.
