O‘zbekiston Prezidenti Turkmanistonning tinchliksevar siyosati Markaziy Osiyoda rivojlanishni ta’minlashning muhim sharti ekanini ta’kidladi
O‘zbekiston Prezidenti Shavkat Mirziyoyev Ashxobodda Türkmenistan doimiy betarafligining 30 yilligiga, Xalqaro betaraflik kuniga va Xalqaro tinchlik va ishonch yiliga bag‘ishlangan xalqaro forumda nutq so‘zladi.
O‘zbekiston Prezidenti Matbuot xizmati xabariga ko‘ra, Shavkat Mirziyoyev o‘z chiqishida Turkmenistanning konstruktiv va tinchliksevar siyosati Markaziy Osiyoda barqarorlik va rivojlanishni ta’minlashning muhim omili ekanini qayd etdi.
«Ashxobodning mintaqada energetika va suv xavfsizligini ta’minlash, barqaror transport bog‘liqligi hamda ekologik tizimni muhofaza qilish bo‘yicha tashabbuslari Markaziy Osiyodagi sa’y-harakatlarimizni to‘ldiradi», — dedi Shavkat Mirziyoyev.
O‘zbekiston Prezidenti nutqi davomida kelgusi yili Toshkentda ijodkorlar, olimlar va yozuvchilar ishtirokida «Madaniyatlar dialogi» nomli qo‘shma xalqaro forum o‘tkazishni hamda «Yoshlar tinchlik va ishonch yo‘lida» nomli yoshlarni ta’lim, madaniyat va volontyorlik sohalaridagi qo‘shma tashabbuslar orqali tinchlik va ishonch tamoyillarini mustahkamlashga yo‘naltirilgan mintaqaviy dasturni yaratishni taklif etdi.
Nutq yakunida Shavkat Mirziyoyev Türkmenistan xalqiga tinchlik, farovonlik va yanada ravnaq tiladi.
