Turkmanistonlik dizayner Azerbaijan Fashion Week’da o‘z kolleksiyasini namoyish qildi
Turkmanistonlik dizayner Govher Pirkuliyeva-Guverne seshanba kuni Boku shahrida Azerbaijan Fashion Week doirasida o‘tkazilgan Oriental Fashion Show’da o‘z kolleksiyasini taqdim etdi.
Govher Pirkuliyeva-Guverne AZERTAC muxbiri bilan suhbatda har bir modelning o‘ziga xos ma’noga ega ekanini hamda Sharq davlatlarining umumiy madaniy merosini aks ettirib, Ipak yo‘li bo‘ylab ramziy sayohatni ifodalashini ta’kidladi.
Dizaynerning aytishicha, Turkmanistonda besh viloyat mavjud bo‘lib, ularning har biri o‘ziga xos naqsh va bezak elementlariga ega. Ushbu mintaqaviy o‘ziga xosliklar podiumda namoyish etilgan obrazlarda o‘z aksini topib, har bir viloyatning betakrorligini va ularning uyg‘unligini yorqin ko‘rsatdi.
Oriental Fashion Show’da to‘qqizta mamlakatdan dizaynerlar ishtirok etishdi. Ular orasida Turkmaniston, Ozarbayjon, Ummon, Misr, Bahrayn, Marokash, Qozog‘iston, O‘zbekiston va Tojikiston dizaynerlari bor.
Oriental Fashion Show — sharqona moda va alta moda (haute couture)ga bag‘ishlangan birinchi xalqaro tadbirdir. 2004-yilda tashkil etilgan ushbu loyiha 50 mamlakatdan 100 dan ortiq dizaynerni muvaffaqiyatli targ‘ib qilgan va hanuzgacha dizaynerlar hamda madaniyat manfaatlari yo‘lida faoliyatini davom ettirmoqda.
