To‘qayev Orol va Kaspiy ekotizimlarini muhofaza qilish muhimligini ta’kidladi
Qozog‘iston Prezidenti Qosim-Jo‘mart To‘qayev Ashxobodda bo‘lib o‘tgan “Tinchlik va ishonch” xalqaro forumida transchegaraviy suv resurslarini boshqarish masalalariga, shuningdek, Orol va Kaspiy dengizlarining ekologik holatiga e’tibor qaratdi.
Qozog‘iston Prezidenti rasmiy matbuot xizmati xabariga ko‘ra, To‘qayev suv xavfsizligi Qozog‘iston va butun mintaqa uchun strategik ustuvor yo‘nalishga aylanganini ta’kidladi.
U Orolni qutqarish xalqaro jamg‘armasi faoliyatini yanada samarali qilish hamda Kaspiy dengizi ekotizimining yemirilishining oldini olish uchun davlatlararo dastur yaratishni taklif etdi.
Shuningdek, Qozog‘iston Prezidenti BMTning mavjud mandatlari va tahliliy mexanizmlarini birlashtira oladigan Xalqaro suv tashkilotini tuzish tashabbusi bilan chiqdi. U ushbu taklif BMTning Barqaror rivojlanish maqsadlariga to‘liq mos kelishini qayd etdi.
Kelasi yil aprel oyida Astanada Mintaqaviy ekologik sammit o‘tkazilishi rejalashtirilgan bo‘lib, unda Qozog‘iston Xalqaro suv tashkilotini tuzish masalasini muhokama qilishni rejalashtirmoqda.
Qosim-Jo‘mart To‘qayev Ashxobod forumining mamlakatlar o‘rtasidagi hamkorlikni mustahkamlashiga va ishonchga asoslangan adolatli jahon tartibini shakllantirishga qaratilgan xalqaro sa’y-harakatlarga yangi sur’at bag‘ishlashiga ishonch bildirdi.
