Redmi K90 Pro Max – Uchta Bose 2.1 karnayi va IP68 suv o‘tkazmasligi bilan ajralib turadigan yangi flagman
Redmi K90 Pro Max smartfoni 27-oktyabr kuni rasman taqdim etiladi. Bu yangi qurilma oddiy smartfonlardan farqli o‘laroq, dunyoga mashhur audio texnologiya ishlab chiqaruvchisi Bose bilan hamkorlikda ishlab chiqilgan 2.1 audio tizimi bilan ajralib turadi.
Yangi tizimda uchta karnay (dinamik) joylashtirilgan bo‘lib, bu foydalanuvchilarga yuqori sifatli stereo ovoz tajribasini taqdim etadi. Ayniqsa, kamera obyektivlari yonida joylashgan va "Sound by Bose" yozuvi tushirilgan dumaloq dinamik bezak emas, balki to‘liq ishlaydigan faol ovoz chiqish qurilmasi ekani ta’kidlanmoqda. Uchinchisi qo‘shilganiga qaramay, bu qurilma IP68 darajasidagi suv va chang o‘tkazmaslik xususiyatini saqlab qolgan.
Redmi, qo‘shimcha funksional imkoniyat sifatida, audio tebranish orqali changni tozalovchi tizimni ham joriy qildi. Ushbu dasturiy ta’minot yordamida karnay teshiklari tebranish orqali o‘z-o‘zini tozalay oladi.
K90 Pro Max modeli yana yangi jinsi (jeans) ko‘k rangdagi ko‘rinishda chiqariladi. Bu rang uchun ishlatilgan maxsus ishlab chiqarish texnologiyasi korpusga haqiqiy matoga o‘xshash tuzilma va sezgi beradi, shu bilan birga ifloslanish, tirnalish va eskirishga qarshi yuqori darajadagi chidamlilikni ta’minlaydi.
Xabarlarga ko‘ra, yangi model Snapdragon 8 Gen 5 Elite protsessori, 6,59 – 6,67 dyuym oraliqdagi tekis 2K displey, ultratovushli barmoq izi skaneri va 50 megapikselli OIS (optik barqarorlashtirish) ga ega asosiy kamera bilan jihozlanadi. Shuningdek, kameralar to‘plamida periskop shaklidagi teleobyektiv ham bo‘ladi.
Yangi Redmi K90 Pro Max dizayni, ovoz sifati va texnik xususiyatlari jihatidan kompaniyaning eng ilg‘or flagmanlaridan biri bo‘lishi kutilmoqda.
