Turkmaniston Prezidenti yirik qurilish loyihalari haqida ma'lumot berdi
Halk Maslahaty yig‘ilishida Turkmaniston Prezidenti Serdar Berdimuhamedov mamlakatda amalga oshirilayotgan va rejalashtirilgan yirik qurilish loyihalari haqida batafsil ma'lumot berdi. Ayni paytda Ashxobod shahrida Turkman davlat arxitektura va qurilish institutining yangi binosi, Turkmanobodda esa Seýitnazar Seýdi nomidagi Turkman davlat pedagogika institutining yangi binosi tez sur’atlarda barpo etilmoqda.
Shuningdek, poytaxtda xalqaro darajadagi onkologiya, pediatriya va stomatologiya markazlari qurilmoqda. "Archman" sanatoriyasida qo‘shimcha 400 o‘rinli yangi binolar majmuasi bunyod etilmoqda.
Prezidentning so‘zlariga ko‘ra, yaqin orada Myrat Garryýew nomidagi Turkman davlat tibbiyot universitetining ko‘p tarmoqli shifoxonasi, Indira Gandi nomidagi Ashxobod tibbiyot kollejining yangi binolari, Ashxobod va Ahal viloyatining Tejen shahrida ko‘p tarmoqli shifoxonalar qurilishi boshlanadi.
Shuningdek, Mary, Balkan va Lebap viloyatlarida xalqaro onkologiya markazlari, Dashoguz viloyatida esa Ona va bola salomatligini muhofaza qilish markazi barpo etilishi rejalashtirilgan.
Transport infratuzilmasini rivojlantirish bo‘yicha ham katta ishlar amalga oshirilmoqda. Garabogazko‘l ko‘rfazi ustidan avtomobil ko‘prigi qurilishi davom etmoqda. Yaqin kunlarda Ashxobod – Turkmanobod yuqori tezlikdagi avtomobil yo‘lining Mary – Turkmanobod qismi foydalanishga topshirilishi kutilmoqda.
Bu yirik loyihalar sog‘liqni saqlash, ta’lim va infratuzilma tizimlarining zamonaviylashtirilayotganining yaqqol isbotidir.
