Xitoy 5600 metr balandlikda haydovchisi yo‘q kon yuk mashinalarini sinovdan o‘tkazdi
Xitoy Shinjon hududidagi dengiz sathidan 5600 metr balandda joylashgan Huoshaoyun konida haydovchisi bo‘lmagan karer yuk mashinalarini muvaffaqiyatli sinovdan o‘tkazganini ma’lum qildi. Interesting Engineering nashriga ko‘ra, bu kon Yer yuzidagi eng baland doimiy yashash maskanidan ham balandroqda joylashgan. Huoshaoyun konida Xitoyda topilgan eng katta va eng yuqori sifatli qo‘rg‘oshin hamda rux zaxiralari mavjud. Xabar qilinishicha, Xitoyda ishlab chiqarilgan haydovchisi yo‘q yuk mashinalari ruda tashish va yuklash bo‘yicha sinovlardan muvaffaqiyatli o‘tgan. 5G texnologiyasi bilan jihozlangan bu avtonom mashinalar dunyodagi eng baland konlarda uzluksiz ishlash imkonini beradi.
Kon Kunlun tog‘larining yetib borish qiyin hududida joylashgan — u Peru davlatidagi, taxminan 5100 metr balandlikda joylashgan va Yer yuzidagi eng baland doimiy aholi yashaydigan nuqta hisoblangan La-Rinconada shaharchasidan ham balanddir. 21 million tonnadan ortiq tasdiqlangan metall zaxiralari bilan bu kon dunyodagi eng yirik qo‘rg‘oshin-rux konlaridan biridir.
Bu balandlikda atmosfera tarkibidagi kislorod miqdori dengiz sathidagi me’yordan atigi yarmi bo‘ladi. O‘ta ekstremal sharoit — muzdek haroratlar, kuchli shamollar, ko‘p yillik muzloq — an’anaviy qo‘l mehnatini juda xavfli va juda samarasiz qiladi.
Qisqasi, bu joy insonning uzoq vaqt ishlashi uchun “o‘lim zonasi”dir. Haydovchisi bo‘lmagan yuk mashinalaridan foydalanish bu xavfli sharoitlarda ishlashi kerak bo‘lgan ishchilarning hayotini to‘liq himoya qiladi.
“O‘lim zonasi” muammosini hal qilish uchun kon operatori Beijing Linghang Zhitu Technology kompaniyasi bilan hamkorlik qilib, to‘liq integratsiyalangan avtonom qazib olish tizimini yaratdi. Xitoyda ishlab chiqarilgan yuk mashinalari xato qilmasligini isbotladi.
