Xitoy dunyodagi eng tez avtomatlashtirilgan poezdni taqdim etdi
Xitoyning Shandun provinsiyasidagi Tsingdao shahrining Syun’an tumanida dunyodagi eng tezkor avtomatlashtirilgan poezd ommaga namoyish qilindi. Ushbu yangi avlod poezdi soatiga 200 km tezlikka chiqa oladi va aqlli transport tizimlarining bir qismidir.
To‘liq avtomatik boshqaruv tizimi
Poezd GoA4 (Grade of Automation 4) tizimi bilan jihozlangan — bu temir yo‘l transportida eng yuqori avtomatlashtirish darajasi bo‘lib, mashinistsiz harakatlanish imkonini beradi. Garchi poezdda mashinist kabinasi saqlangan bo‘lsa-da, dastlab unda odam nazoratchi sifatida bo‘lishi kutilmoqda.
Bu Xitoydagi birinchi to‘liq avtomatlashtirilgan poezd bo‘lib, dunyodagi eng tez avtomatik poezd hisoblanadi. Aqlli tizim yuqori tezlikda va uzoq stansiyalararo masofalarda ham real vaqtda ma’lumot yig‘ib, tahlil qilib, mustaqil qaror qabul qila oladi. Xatolik ehtimoli 95% dan ko‘proq kamaytirildi.
Xavfsizlik va texnologiyalar
Poezd xavfsizlik jihatidan kuchaytirilgan. U 2900 dan ortiq datchiklar bilan jihozlangan bo‘lib, yurish, tormoz va tortish tizimlarini real vaqt rejimida nazorat qiladi va nosozliklarga millisoniyalarda javob qaytaradi.
Sun’iy intellekt va raqamli egizak texnologiyasi asosida yaratilgan texnik xizmat tizimi nosozliklarni oldindan bashorat qiladi va ta’mirlash bo‘yicha qarorlar qabul qilishga yordam beradi.
Passiv xavfsizlik ham kuchaytirildi — yangi zarba yutuvchi elementlar va energiya yutuvchi tuzilmalar poezdning to‘qnashuvga chidamliligini ikki baravar oshirdi.
Aerodinamika va samaradorlik
Poezd korpusi qayta loyihalandi: o‘zgaruvchan kesimli havo o‘tkazgichlar qarshilikni kamaytiradi, yurish qismlaridagi himoya qoplamalari esa havo oqimlarini barqarorlashtiradi.
Ekspluatatsion xarajatlar kamaytirildi — 200 dan ortiq ehtiyot qismlar standartlashtirildi va aqlli diagnostika tizimi texnik xizmatni optimallashtirib, umumiy xarajatlarni kamaytirishga yordam beradi.
Yangi yo‘nalish va istiqbollar
Bu poezd "Pekin–Syun’an Ekspress" yo‘nalishida harakat qiladi — Syun’anni Pekin Daxing xalqaro aeroporti bilan bog‘laydi. Ishga tushirilgach, u Syun’an–aeroport o‘rtasini 30 daqiqa, Syun’an–Litse biznes tumanini 60 daqiqa ichida bosib o‘tadi. Bu “Pekin–Syun’an” bir soatlik transport halqasini yaratishda muhim qadam bo‘ladi.
