«Magtymguly Pyragy» filmi Özbegistanyň milli kino baýragynyň baş derejesi boýunça ýeňiji boldy
17-nji dekabrda Daşkent şäheriniň Milli kino sungaty köşgünde «Oltin Humo — 2025» milli kino baýragyny gowşurmak dabarasy geçirildi.
Şol ýerde Türkmenistanyň we Özbegistanyň kinematografiýa ulgamynyň wekilleriniň bilelikdäki tagallalary bilen döredilen «Magtymguly Pyragy» çeper filmi Özbegistanyň milli kino baýragynyň baş derejesinde ýeňiji boldy. Ol «Iň gowy film» diýlip yglan edildi. Bu üstünlik iki ýurduň arasyndaky netijeli medeni hyzmatdaşlygyň we dostlukly gatnaşyklaryň pugtalandyrylýandygynyň nobatdaky subutnamasyna öwrüldi.
Gerimli kino taslamasy Gündogaryň beýik akyldarynyň we şahyrynyň doglan gününiň 300 ýyllygy mynasybetli döredildi. Filmi surata düşürmek işleri Özbegistanyň Kinematografiýa agentliginiň, Türkmenistanyň Oguz han adyndaky «Türkmenfilm» birleşiginiň we Özbegistanyň Milli kinematografiýany ösdürmek merkeziniň goldaw bermeginde amala aşyryldy.
«Oltin Humo» baýragy ugrundaky bäsleşikde eýe bolan ýeňşi bu filmiň halkara derejesinde ykrar edilýändiginiň beýany boldy.
