Türkmenabat şäheriniň zehinli çagalary halkara sungat bäsleşiklerinde üstünlik gazandy
Türkmenabat şäherindäki Çeperçilik mekdebiniň döredijilik bilen gyzyklanýan zehinli okuwçylary halkara baýramçylykly bäsleşiklerde üstünlikli çykyş edip, ýurdumyzyň adyny dünýäde belentden-belent etdi. Aziza Bäşimowa özüniň surat işi bilen Russiýanyň paýtagty Moskwada geçirilen «Dünýäniň çagalary: Döwür dostlaşdyrýar» atly halkara festiwal-bäsleşiginde çykyş edip, baş baýragyň eýesi boldy. Şeýle hem onuň ýyldaşlary Nurana Jumaýewa, Gülüstan Rejepowa hem-de Dünýägözel Şadyýewa Azerbaýjanyň Baku şäherinde geçirilen «Dostlugyň şäheri» ady bilen meşhur bolan çagalaryň VII halkara sungat bäsleşiginde baýrakly orunlara mynasyp boldular.
Bu üstünlikleriň gazanylmagynda mekdebiň tejribeli mugallymy Ýelena Işankulyýewanyň uly paýy bar. Onuň ýolbaşçylygynda taýýarlanan işleriň mazmuny ýurdumyzdaky hemişelik Bitaraplyk syýasatynyň parahatçylyk, dostluk we ynsanperwerlik ýörelgelerine daýanýandygyny görkezýär. Döredijilik işlerinde ýurdumyzyň medeni-ruhy gymmatlyklary, edep-kadalary hem-de milli ýörelgeleri aýdyň şöhlelendirilýär.
Aziza Bäşimowanyň «Geliň, dostlaşalyň!» atly eseri halkara bäsleşikde aýratyn baha berildi. Surat eseri dünýäniň dürli ýurtlaryndan gatnaşan ýaş suratkeşlere diňe bir döredijilik möhüm däl, eýsem ynsanperwer hem-de hoşniýetlilik taglymlarynyň ähmiýetini wagyz edýär. Paýhasly çeperçilik arkaly Watanymyzyň parahatçylyk söýüjilik syýasaty açyk şöhlelendirilýär.
Ýelena Işankulýewa ýaş zehinlere nakgaşlygyň inçe syrlaryny we usullaryny yhlas bilen öwredip, olaryň döredijilikde has-da ösmegine mümkinçilik döredýär. Şonuň netijesinde onuň şägirtleri halkara derejesindäki abraýly baýraklara eýe bolýarlar.
Soňky günlerde welaýatyň taryhy we ülkäni öwreniş muzeýinde üstünlik gazanan okuwçylara diplomlar, sowgatlar we güller dabaraly ýagdaýda gowşuryldy. Çärä jemgyýetçilik guramalarynyň, syýasy partiýalaryň wekilleri, medeniýet işgärleri, talyp ýaşlar hem-de döredijilik toparlary gatnaşdy.
Şeýle hem sungaty ösdürmäge we ýaşlara yzygiderli goldaw berýänligi üçin mugallym Ýelena Işankulyýewa Türkmenistanyň Medeniýet ministrliginiň we welaýat medeniýet müdirliginiň Hormat hatlary bilen sylaglanyldy.
