Aşgabatda bilimi sanlylaşdyrmak boýunça garyşyk maslahat geçirildi

Noý 27, 2025 - 16:36
Aşgabatda bilimi sanlylaşdyrmak boýunça garyşyk maslahat geçirildi

Ýagşygeldi Kakaýew adyndaky Halkara nebit we gaz uniwersitetinde «Ylym-bilim ulgamyna sanly innowasion tehnologiýalary ornaşdyrmagyň mümkinçilikleri» atly halkara ylmy-amaly maslahaty öz işini tamamlady. Çäre garyşyk (gibrid) görnüşde geçirilip, Türkmenistandan, Germaniýadan, Malaýziýadan, Hytaýdan, Ýaponiýadan, Eýrandan, Belarusdan, BAE-den we beýleki ýurtlardan hünärmenleri bir ýere jemledi.

Maslahatyň çäklerinde emeli aňyň dünýä tejribesi, sanly çözgütleriň bilime we önümçilige edýän täsiri, şeýle hem kiberhowpsuzlyk bilen baglanyşykly meseleler boýunça çykyşlar edildi. Sanly ulgamlaryň ornaşdyrylmagynyň amaly mysallary we maglumatlary goramak mehanizmleri aýratyn gyzyklanma döretdi.

Esasy çykyşlaryň biri Türkmenistanyň Aragatnaşyk ministrliginiň wekili tarapyndan edildi. Ol 2025-nji ýylyň maý aýynda BMG-niň Ösüş Maksatnamasy (BMGÖM) bilen bilelikde amala aşyrylan taslama barada gürrüň berdi. Taslamanyň netijesinde döwlet edaralarynyň arasynda maglumatlaryň çalt we ygtybarly alyş-çalyşyny üpjün edýän Ähli edaralaryň elektron maglumat alyş-çalyş ulgamy işe girizildi. Bu ulgam iş prosesleriniň açyklygyny ýokarlandyrýar we ilata hem-de işewürlige elektron döwlet hyzmatlaryny giňeltmek üçin esas döredýär.

Wekil, BMG-niň Ösüş Maksatnamasy bilen hyzmatdaşlygyň häzirki zaman sanly infrastrukturasyny döretmäge, innowasion ekoulgamy ösdürmäge we tehnologik telekeçiligi goldamaga mümkinçilik berendigini belledi. Döwlet gullukçylarynyň hünär derejesini ýokarlandyrmak üçin halkara okuw türgenleşiklerine we öňdebaryjy merkezler bilen hyzmatdaşlyga aýratyn üns berilýär. Olaryň arasynda Estoniýadaky E-governance Academy hem-de Russiýadaky Innopolis uniwersiteti bar.

Maslahatyň jemleri boýunça gatnaşyjylar halkara taslamalaryny dowam etmegiň we tejribe alyşmagyň Türkmenistanyň sanly infrastrukturasyny berkitmekde hem-de döwlet hyzmatlarynyň hilini ýokarlandyrmakda möhüm ähmiýete eýedigini nygtadylar.