Türkmenistan «Bitewi saglyk» taslamasy boýunça pudagara hyzmatdaşlygy pugtalandyrýar
Aşgabatda «Bitewi saglyk» çemeleşmesiniň çäklerinde daşky gurşaw we saglygy goraýyş mümkinçiliklerini kämilleşdirmek» atly iki günlük seminar geçirildi.
Çäräni Bütindünýä Saglygy Goraýyş Guramasynyň (BSGG) Türkmenistandaky ýurt ofisi we Türkmenistanyň Saglygy goraýyş we derman senagaty ministrligi bilelikde gurnady.
17–18-nji noýabrda saglygy goraýyş, ekologiýa, oba hojalygy we durmuş-ykdysady ösüş ugurlarynda zähmet çekýän halkara we milli hyzmatdaşlar daşky gurşawy hem saglygy goramak boýunça ileri tutulýan meseleleri, olaryň «Bitewi saglyk» çemelmesi bilen utgaşdyrylmagynyň mümkinçiliklerini hem-de bu ugurdaky global we sebit tendensiýalaryny ara alyp maslahatlaşdylar. Esasy üns edaralaryň arasyndaky utgaşyklylygy güýçlendirmäge we ekologik hem arassaçylyk babatyndaky kynçylyklara jogap bermek boýunça milli mümkinçilikleri ýokarlandyrmaga gönükdirildi.
Seminaryň açylyşyna Türkmenistanyň Bütindünýä Saglygy Goraýyş Guramasynyň, Birleşen Milletler Guramasynyň Daşky gurşaw boýunça Maksatnamasynyň, Merkezi Aziýa üçin Haýwanlaryň saglygyny goramak boýunça Bütindünýä guramasynyň hem-de BMG-niň Azyk we Oba hojalygy guramasynyň milli utgaşdyryjysynyň wekilleri gatnaşdylar. Halkara guramalaryň wekilleri «Bitewi saglyk» diýen ulgamlaýyn çemeleşmäniň ähmiýetini, onuň adamyň, haýwanyň saglygynyň we daşky gurşawyň abatlygynyň özara bagly nokatlarynda töwekgelçilikleriň öňüni almakdaky möhüm ornuny hem-de milli mümkinçilikleri we edaralaryň arasyndaky utgaşyklylygy güýçlendirmegiň zerurdygyny aýratyn nygtadylar.
Bu ýerde Türkmenistanyň Saglygy goraýyş we derman senagaty ministrliginiň, Maliýe we ykdysadyýet ministrliginiň, Daşky gurşawy goramak ministrliginiň hem-de Oba hojalyk ministrliginiň wekilleri çykyş etdiler. Olar saglyk we ekologiýa meselelerinde edaralaryň arasyndaky sazlaşykly gatnaşygyň ähmiýetine ünsi çekdiler. Döwlet edaralarynyň wekilleri öz çykyşlarynda Türkmenistanyň durnukly ösüş ýörelgelerine ygrarlydygyny belläp, sanitariýa-epidemiologik kynçylyklara netijeli jogap bermek üçin edaralaryň arasynda utgaşykly işleriň möhümdigini we «Bitewi saglyk» çemeleşmesini ilerletmekde halkara hyzmatdaşlar bilen dowam edýän hyzmatdaşlygyň ähmiýetini tassykladylar.Sminarda Merkezi Aziýada Sebit ekologiýa merkezine ýurdumyz boýunça Türkmenistandaky taslama ofisiniň direktory Mergen Kepbanow hem-de «Bitewi saglyk» taslamasy boýunça sebit bilermeni Maral Çommadowa wekilçilik etdi.
«Bu seminarda CAREC-e (Merkezi Aziýa üçin Sebitleýin ekologiýa merkezi) wekilçilik etmek meniň üçin uly hormatdyr. Şeýle duşuşyklar pudaklaryň arasyndaky dialogy berkitmäge we saglyk hem-de daşky gurşawy goramak meselelerinde umumy çemeleşmeleri işläp taýýarlamaga ýardam berýär» diýip, Mergen Kepbanow belledi.
