Türkmenistandan bolan talyp “Türk halklarynyň iň gowy talyby” halkara bäsleşiginiň ýeňijisi boldy
Magtymguly adyndaky Türkmen döwlet uniwersitetiniň hukuk fakultetiniň “hukuk öwreniş” hünäriniň IV ýyl talyby Nuryagdy Baýryýew “Türk halklarynyň iň gowy talyby” atly halkara bäsleşiginiň ýeňijisi boldy.
Türkmen ýokary okuw mekdebiniň talyby bu çärä onlaýn görnüşde üstünlikli gatnaşdy. Bäsleşigiň netijelerine görä, türk halklarynyň ýaşlar syýasatyny ösdürmäge goşan üstünlikleri we hyzmatlary üçin Nuryagdy halkara bäsleşiginiň I derejeli Diplomy, merkaly nyşany we kubogy bilen sylaglanyldy.
Bäsleşik Gazagystan Respublikasynyň Astana şäherinde geçirildi. Halkara bäsleşiginiň guramaçylary hökmünde Milli innowasion ylmy-barlag merkezi “Bilim-orkenieti” hem-de Respublikan innowasion merkezi “Žana Kazakhstan” çykyş etdiler.
Mundan ozal biz Magtymguly adyndaky TDU-nyň “Taryh” hünäriniň IV ýyl talyby Zyýada Ýusupowanyň hem “Türk halklarynyň iň gowy talyby” halkara bäsleşiginiň ýeňijileriniň arasynda saýlananlygy barada habar beripdik.
