9 ga 11: PSG yana gʻalaba qozondi
PSG Klublar Jahon Chempionati chorak finalida Bavariyani 2:0 hisobida mag‘lub etdi — ikki qizil kartochka, Musialaning og‘ir jarohati va Dembele hamda Doue tomonidan ko‘rsatilgan qahramonliklar o‘yinni dramatik holatlarga to‘ldirdi. Parijliklar endi final yo‘llanmasi uchun yarim finalda kurashadi!
Parij klubi PSG Klublar Jahon Chempionati (KJCH) chorak finalida kuchli raqib — Myunxenning “Bavariya”sini ikki futbolchisi maydondan chiqarilgan bo‘lishiga qaramay 2:0 hisobida mag‘lub etdi. Biroq o‘yin faqat natijasi bilan emas, balki dramatik lahzalari — xususan, Jamol Musialaning og‘ir jarohati bilan ham esda qoldi.
O‘yin borishi: Bavariyaning bosimi va PSGning sabrli qarshiligi
Dastlabki daqiqalardan “Bavariya” kuchli pressing bilan PSGni o‘z maydoniga siqib chiqdi. Nemislar to‘pni raqib hududida ushlab, xavfli hujumlar uyushtirishga harakat qilishdi. PSG esa o‘ylangan qarshi hujumlar bilan javob qaytardi.
1-bo‘limda Kvaratsxeliya bir necha marta Umpamekanoni aldab o‘tib xavfli vaziyatlar yaratdi. Ba’zi epizodlarda Noer jamoasini qutqardi, lekin PSG orqaga chekinmadi.
Jarohatlar va qizil kartalar
1-bo‘limda dramatik holatlar bo‘ldi — Bavariyadan Shtanishich jarohat olib, almashtirildi. So‘ngra Jamol Musiala Donnarumma bilan to‘qnashib og‘ir jarohat oldi. Bu uning KJCHga qaytgan birinchi o‘yini edi, endi esa uzoq vaqt maydondan chetda qolishi mumkin.
78-daqiqada PSG Desire Doue'ning goli bilan oldinga chiqdi. Portugaliyalik Neves Keyndan to‘pni olib, o‘ta mahoratli qarshi hujumni tashkil etdi. Bu safar Noer reaksiya ko‘rsata olmadi.
82-daqiqada PSG futbolchisi Paco Goretzkaning oyog‘iga qattiq kirgani uchun to‘g‘ridan-to‘g‘ri qizil kartochka oldi. 90+2-daqiqada esa Lukas Ernandes raqibga tirsagi bilan zarba bergani uchun maydondan chetlatildi — PSG maydonda 9 futbolchi bilan qoldi.
So‘nggi zarba: Dembele va Hakimi
Kutilgan qarshi hujum bo‘lib o‘tdi. 90+6-daqiqada Hakimi o‘z himoya zonasidan hujum boshladi va uzoqqa Dembelega pas uzatdi. Dembele raqib himoyasini yorib o‘tib, ikkinchi golni urdi. PSG g‘alabani mustahkamladi — va finalga bir qadam qoldi.
Penalti va VAR dramasi
90+9-daqiqada hakam Entoni Teylor PSG darvozasiga penalti belgiladi. Ammo VAR ko‘rigidan so‘ng Mendeshning Myullerni boshi bilan urmaganligi aniqlandi va penalti bekor qilindi. Shundan so‘ng o‘yin tugadi.
Natija va navbatdagi raqib
Kamchilikda qolganiga qaramay, PSG yirik g‘alabani qo‘lga kiritdi. Endi ular “Real Madrid” va “Borussiya Dortmund” o‘rtasidagi g‘olib bilan finalda to‘qnashadi. Bu voqealarga boy o‘yin yana bir bor futbol qanday his-tuyg‘ularni yetkazishini ko‘rsatdi.
Statistika:
KJCH — Chorak final
PSG – Bavariya: 2:0
Gollar:
78' — Doue
90+6' — Dembele
Qizil kartochkalar (PSG):
Paco — 82'
Ernandes — 90+2'
