Xitoyda reaktiv ryukzak amalda namoyish etildi
Chjetszyan universiteti huzuridagi Xuchjou ilmiy-tadqiqot instituti muhandislar jamoasi insonni havoda harakatlantira oladigan reaktiv ryukzakni muvaffaqiyatli sinovdan o‘tkazdi.
Report nashrining Xitoy markaziy televideniyesiga tayanib xabar berishicha, bunday shaxsiy uchuvchi qurilmani boshqarayotgan uchuvchi soatiga 100 km tezlikka erisha oladi.
“Bu ryukzakni ishlab chiqish 3–4 yil, parvoz sinovlari esa 2 yil davom etdi. Bu bizning eng mukammal va tayyor tizimimiz,” — dedi JetRob jamoasi muhandisi Szyao Botszin, u qisqa namoyish parvozini amalga oshirdi.
Qurilma beshta reaktiv dvigatel bilan jihozlangan. Yonilg‘i baklari ryukzakning ikki tomonida joylashgan. Qurilmaning o‘zi 31 kg, to‘liq yonilg‘i bilan 46 kg tortadi. Uchuvchi havoda 3–5 daqiqa qolishi mumkin. U 2 metrdan ortiq balandlikka ko‘tarila oladi va dengiz sathidan 1500 metr balandlikdagi joylarda ishlatilishi mumkin.
Szyao Botszinning so‘zlariga ko‘ra, ryukzakni xavfsiz va silliq boshqarishni o‘rganish uchun ma’lum vaqt kerak — bu velosiped minishni o‘rganishga o‘xshaydi. Kelajakda, u aytishicha, gumanoyid robotlar ham bu ryukzaklardan foydalanib, xavfli yoki yetib bo‘lmaydigan joylarda parvozlarni amalga oshira oladi.
