Özbegistan Merkezi Aziýa jemgyýetini döretmegi teklip etdi
Özbegistanyň Prezidenti Şawkat Mirziýoýew Merkezi Aziýa döwletleriniň ýolbaşçylarynyň Geňeşme duşuşygynyň derejesini ýokarlandyrmagy — ony strategik hyzmatdaşlyk derejesindäki formata öwürmegi teklip etdi. Bu barada Kazinform agentliginiň ýörite habarçysy mälim etdi.
Prezident Mirziýoýew sammite ýolbaşçylyk etmek bilen, duşuşygyň mazmunyny döwrebaplaşdyrmak we onuň ähmiýetini ýokarlandyrmak boýunça birnäçe başlangyç bilen çykyş etdi.
— Häzir duşuşyklarymyz adaty sebit derejesindäki gepleşikleriň çäginden çykyp, Merkezi Aziýa jemgyýeti görnüşindäki strategik formatda dowam etmelidir. Şu sebäpli Geňeşme duşuşyklarynyň kadalaryny kesgitleýän ýörite resminamanyň taýýarlanylmagyny teklip edýäris. Mundan başga-da, wagtlaýyn esasda işlejek sekretariaty döretmek zerur. Milli utgaşdyryjylaryň derejesini hem prezidentleriň ýörite wekili derejesine çenli ýokarlandyrmagy ýerlikli hasaplaýarys, — diýip, Özbegistanyň ýolbaşçysy belledi.
Şawkat Mirziýoýewiň ýene bir teklibi — durmuş tejribesi baý jemgyýetçilik işgärlerinden ybarat Ak sakgallar geňeşini döretmek boldy. Onuň pikiriçe, şeýle geňeş nesiller arasyndaky baglanyşyklary berkitmäge, sebitleýin hyzmatdaşlygy çuňlaşdyrmaga hem-de Merkezi Aziýanyň özboluşlylygyny goldap, halk diplomatiýasynyň umumy gymmatlyklaryna daýanmaga mümkinçilik berer.
Şunuň bilen birlikde, sammitiň çäklerinde Azerbeýjan Merkezi Aziýa döwletleriniň ýolbaşçylarynyň Geňeşme duşuşygynyň deňhukukly agzasy hökmünde kabul edildi.
