AQSh Turkmaniston fuqarolari uchun ayrim viza cheklovlarini bekor qildi
AQSh Prezidenti Donald J. Tramp tomonidan 2025-yil 16-dekabr kuni imzolangan yangi prezident farmoniga muvofiq, Turkmanistonga oid viza qoidalarida muhim yengilliklar joriy etildi.
Rasmiy hujjatda qayd etilishicha, so‘nggi paytlarda Turkmaniston AQSh bilan faol va konstruktiv hamkorlik olib bordi hamda shaxsni aniqlash va axborot almashish sohasida sezilarli yutuqlarga erishdi. Natijada:
Turkmaniston fuqarolarining AQShga qisqa muddatli vizalar (B-1, B-2, B-1/B-2), ta’lim vizalari (F, M) hamda almashinuv dasturlari ishtirokchilari uchun mo‘ljallangan vizalar (J) bo‘yicha kirishiga qo‘yilgan cheklovlar to‘liq bekor qilindi.
Shu tariqa, Turkmaniston fuqarolari uchun AQShga xizmat safari, turistik, ta’lim va akademik maqsadlarda borish yo‘li ochildi.
Shu bilan birga, Turkmaniston fuqarolarining AQShga immigratsion vizalar (doimiy yashash uchun mo‘ljallangan vizalar) orqali kirishi hozircha vaqtincha cheklangan holda qolmoqda.
Amerika tomoni vakillarining ta’kidlashicha, ushbu qaror Turkmanistonning tegishli sohalardagi hamkorlikni davom ettirishiga qarab, kelgusida yanada kengaytirilishi mumkin. Yangi qoidalar 2026-yil 1-yanvardan kuchga kiradi.
Mazkur qaror ta’lim olishni, xalqaro almashinuv dasturlarida ishtirok etishni hamda qisqa muddatli safarlarni rejalashtirayotgan Turkmaniston fuqarolari uchun muhim va ijobiy yangilik sifatida baholanmoqda.
