O‘zbekiston Markaziy Osiyo Hamjamiyatini tuzishni taklif qildi
O‘zbekiston Prezidenti Shavkat Mirziyoyev Markaziy Osiyo davlatlari rahbarlarining Maslahat uchrashuvining maqomini oshirib, uni strategik hamkorlik darajasidagi formata aylantirishni taklif etdi. Bu haqda Kazinform agentligining maxsus muxbiri xabar berdi.
Sammiyga raislik qilgan Shavkat Mirziyoyev uchrashuvning mazmunini zamonaviylashtirish va uning nufuzini oshirish bo‘yicha bir qator tashabbuslarni ilgari surdi.
“Uchrashuvlarimizni oddiy mintaqaviy muloqot doirasidan chiqarib, Markaziy Osiyo Hamjamiyati ko‘rinishidagi strategik formatda davom ettirish vaqti keldi. Shu bois Maslahat uchrashuvlarining institutsional va tashkiliy asoslarini belgilab beradigan maxsus hujjat ishlab chiqilishini taklif qilamiz. Bundan tashqari, navbatma-navbat ishlaydigan kotibiyatni tuzish zarur. Milliy muvofiqlashtiruvchilarning maqomini esa prezidentlarning maxsus vakili darajasigacha oshirishni maqsadga muvofiq deb bilamiz,” — dedi O‘zbekiston rahbari.
Shavkat Mirziyoyevning yana bir tashabbusi — hayotiy tajribasi boy bo‘lgan jamoat arboblaridan iborat Oqsoqollar kengashini tashkil etish taklifi bo‘ldi. Uning fikricha, bu tashabbus avlodlar orasidagi aloqalarni mustahkamlaydi, mintaqaviy hamkorlikni chuqurlashtiradi va xalq diplomatiyasi qadriyatlariga tayangan holda Markaziy Osiyoning o‘ziga xosligini mustahkamlashga xizmat qiladi.
Shuningdek, sammit davomida Ozarbayjon Markaziy Osiyo davlatlari rahbarlarining Maslahat uchrashuvining teng huquqli a’zosi sifatida qabul qilindi.
