Turkmanistonlik bokschi Bayramdurdi Nurmuhammedov jahon chempionatida bronza medalini qo‘lga kiritdi
Turkmanistonlik bokschi Bayramdurdi Nurmuhammedov 71 kg vazn toifasida boks bo‘yicha jahon chempionatining bronza medali sovrindori bo‘ldi. Musobaqa BAAning Dubay shahrida bo‘lib o‘tdi.
Mazkur vazn toifasida 36 nafar sportchi medallar uchun kurash olib bordi. Turnirning dastlabki jangida Nurmuhammedov Albaniya vakili Alban Bekirini mag‘lub etdi. Ikkinchi jangda u Eronlik Moslem Mahsudiy ustidan ishonchli g‘alabaga erishdi, uchinchi jangda esa ispaniyalik Frank Martinesni yengdi.
Yarim finalda turkmanistonlik bokschi rossiyalik Sergey Koldenkov bilan to‘qnash keldi. Jang yakunida rossiyalik sportchi g‘alaba qozondi va keyinchalik kumush medal sohibiga aylandi. Ushbu vazn toifasida oltin medalni Qozog‘iston vakili Ablayxan Jusupov qo‘lga kiritdi.
Jahon chempionati Xalqaro boks assotsiatsiyasi (IBA) homiyligida o‘tkazildi. Turnirning umumiy mukofot jamg‘armasi 8,32 million AQSh dollarini tashkil etdi. Har bir vazn toifasida g‘oliblarga 300 ming dollar, kumush medal sohiblariga 150 ming dollar, bronza medal sohiblariga esa 75 ming dollar mukofot berildi.
