Çagalaryň bagtyýar geljegi — Döwletiň Baş ýörelgesi
Paýtagtymyz Aşgabatda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa bilen Ministrler Kabinetiniň medeniýet ulgamyna gözegçilik edýän orunbasarynyň hem-de ýurdumyzyň köpçülikleýin habar beriş serişdeleriniň zenan ýolbaşçylarynyň arasynda duşuşyk geçirildi.
Duşuşyklaryň dowamynda ösüp gelýän ýaş nesliň saglygyny goramak, olaryň döredijilik ukyplaryny ýüze çykarmak, şeýle hem çeper zehinini ösdürmek bilen baglanyşykly meseleler giňişleýin ara alnyp maslahatlaşylýar. Şeýle çäreler hormatly Prezidentimiziň we Gahryman Arkadagymyzyň ýolbaşçylygynda üstünlikli durmuşa geçirilýän giň gerimli özgertmeleriň çäklerinde amala aşyrylýar. Milli bilim ulgamynda alnyp barylýan bu işleriň ýaşlaryň kämil şahsyýetler hökmünde kemala gelmegine uly mümkinçilik döredýändigi nygtalýar.
Gaznanyň döredilmeginiň dört ýyllygy mynasybetli geçirilmegi meýilleşdirilýän “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahat bilen baglanyşykly taýýarlyk işleri hem duşuşyklarda ara alnyp maslahatlaşylýar. Şeýle hem gaznanyň howandarlygynda yglan edilýän “Halkara parahatçylyk we ynanyşmak ýyly: çagalaryň gözýetimi, dünýägaraýşy” atly döredijilik bäsleşigine taýýarlyk işleri hem alnyp barylýar. Bäsleşik surat çekmek, amaly-haşam sungaty, aýdym-saz we tans sungaty, türkmen milli oýunlary ýaly ugurlarda, 4 ýaşdan 11 ýaşa çenli çagalaryň gatnaşmagynda geçirilýär.
Duşuşyklarda gaznanyň soňky ýyllarda ýerine ýetiren işleri, şol sanda 500-den gowrak näsag çaganyň saglygynyň dikeldilmegine, çagalar hassahanalarynyň döwrebap lukmançylyk enjamlary bilen üpjün edilmegine aýratyn üns berilýär. Şeýle hem bu ugurda alnyp barylýan ynsanperwer işleriň köpçülikleýin habar beriş serişdelerinde, şol sanda halkara metbugatda giňden wagyz edilmeginiň zerurdygy bellenilýär.
Howandarlyga mätäç çagalara hemaýat bermek boýunça gaznanyň alyp barýan işleri ýaşlaryň döredijilik ukyplaryny ösdürmäge, sagdyn durmuş ýörelgelerini ornaşdyrmaga, jemgyýetde ynsanperwerligiň we hoşniýetli başlangyçlaryň rowaçlanmagyna gönükdirilendir. Duşuşyklarda gaznanyň bu asylly maksatlaryny giňden beýan etmekde köpçülikleýin habar beriş serişdeleriniň orny hem aýratyn nygtalýar.
