Ygtybarly hyzmatlar, hyrydarly harytlar
Ýurdumyzyň ykdysady ösüşlerine uly goşant goşýan hususy önümçilikleriň hatarynda, Türkmenistanyň Senagatçylar we Telekeçiler birleşmesiniň agzasy bolan, Saýat etrabynyň Sakar şäherindäki “Türkmen ýyldyzy” hojalyk jemgyýetini hem görkezmek bolar.
2009-njy ýylda döredilen bu hojalyk jemgyýetine telekeçi Aganazar Rejepowyň ýolbaşçylygynda elektrik geçirijileriň gurnalyşygy, elektrik paýlaýjy bekedleriň abatlaýyş işleri, ýokary woltly elektrik geçirijileriniň we paýlaýjy bekedleriň taslamalaryny taýýarlamak, elektrik enjamlarynyň we metallaryň barlaghanalardan geçirilmegi, elektrotehniki desgalaryň gurnalyşygy, rele goraglylygynyň üpjün edilmegi, elektrik maşynlarynyň we transformatorlaryň bejerilmegi, şeýle hem elektrik kabelleriniň we simleriniň önümçiligi ýaly işler üstünlikli amala aşyrylýar.
2020-nji ýylda hojalyk jemgyýetimiziň tarapyndan Çärjew etrabynyň çäginde bölünip berlen 2 gektar ýerde elektrotehniki zawod işe girizilip, daşky izolýirlenen, ýagny gorag gatlagy bilen örtülen elektrik simleriniň hem-de montaj kabelleriniň önümçiligi ýola goýuldy. Ilkibaşda bu ýerde alýuminden taýýarlanylýan 12 görnüşli önüm öndürilse, 2022-nji ýylda bu görnüşleriň sany 23-e ýetirilipdi. Häzirki wagtda zawodymyzda “Gerim” haryt nyşanly önümleriň 33 görnüşi taýýar edilýär.
Önümçilige Hytaý Halk Respublikasynyň hem-de Ýewropa döwletleriniň käbir enjamlary ornaşdyryldy. Zawodyň önümçilik kuwwaty ýylda 700 tonna çenli çig maly işlemek mümkinçiligine ýetirilendir. Bu ýerde alýumin elektrik simleri bilen bir hatarda daşky gorag gatlagy bilen örtülen mis simleriniň, şeýle-de 2 we 4 hatar simli montaj kabelleriniň önümçiligi üstünlikli ýola goýuldy.
Ýakynda bolsa bu ýerde täze önüm — uzynlygy 1,5 metr, 3 we 5 metr bolan elektrik uzaldyjylary öndürilip başlandy. Önümçiligimizde ýokary woltly howa ulgamyna niýetlenen elektrik geçirijileriniň dürli görnüşleri taýýar edilýär diýip, hojalyk jemgyýetiniň direktorynyň orunbasary Nurmyrat Agamämmedow gürrüň berýär.
Döredilmeginden bäri geçen 16 ýylyň dowamynda, hojalyk jemgyýetiniň energetik hyzmatlar ulgamyndaky ýerine ýetirýän işleriniň gerimi has-da giňeldilip, ýurdumyzda ýerleşýän hususy hem-de döwlet kärhanalary, şeýle-de dünýä belli daşary ýurt kompaniýalary bilen netijeli işler ýola goýuldy. Ýerine ýetirilen ygtybarly we ýokary hilli hyzmatlara edaralardan, kärhanalardan hem-de şahsy taraplardan gelýän islegler yzygiderli artýar.
— Biz geljekde hem hödürlenilýän hyzmatlaryň çägini giňeltmegi maksat edinýäris. Hojalyk jemgyýetimiziň elektroenergetik desgalary we ulgamlary gurmakda, gurnamakda, sazlamakda, ýokary woltly synagdan geçirmekde hem-de abatlaýyş işlerini alyp barmakda uly tejribesi bar. Şol sanda 500 kilowolta çenli ýokary woltly elektrik paýlaýjy bekedleriň we elektrik geçirijileriniň ulgamlarynyň taslamasyny taýýarlamaga, gurluşyk işlerini alyp barmaga, şeýle-de kuwwatlylygy 25 megawata deň bolan transformatorlara we kuwwatlylygy 630 kilowata çenli bolan generatorlara we elektrik herekeltirijilere hyzmat etmäge mümkinçiliklerimiz bar.
