Türkmenistanyň “Oguzrobot” topary Panamada robotlar boýunça halkara ýaryşda birinji orna mynasyp boldy
29-njy oktýabr — 1-nji noýabr aralygynda Panama Respublikasynyň Panama şäherinde mekdep okuwçylarynyň arasynda geçirilen “Robotlaryň Olimpiadasyna” Türkmenistanyň “Oguzrobot” topary gatnaşdy. Topar, halkara ýaryşyň robotlaryň ýeke-täk bäsleşmek bölüminde (Skills Challenge) üstünlikli çykyş edip, birinji orna mynasyp boldy.
Ýaryşyň şertine laýyklykda, toparyň taýýarlan roboty ýerine ýetirmeli işleri 50 sekuntyň dowamynda doly berjaý edip, jemi 54,6 bal toplady.
2017-nji ýyldan bäri her ýyl geçirilýän robot tehnologiýasy boýunça “First Global Challenge — 2025” halkara ýaryşyna 190 döwletiň ýaş inženerleri gatnaşdy.
Ýurdumyzyň adyndan Aşgabadyň ýöriteleşdirilen 97-nji orta mekdebiniň okuwçylary Ysmaýyl Çaryýew, Emirhan Gylyçmuhammedow, Aznawur Çolukow, Şirmuhammet Gulow we Gurbangeldi Orazgeldiýew düzülen “Oguzrobot” topary wekillelik etdi. Topara tejribeli mugallym Myrat Sähetgulyýew ýolbaşçylyk etdi we okuwçylar birnäçe aýlap halkara ýaryşa taýýarlyk gördüler.
Ýaryşyň netijelerine görä, ikinji orna Ermenistan Respublikasynyň, üçünji orna Hytaý Halk Respublikasynyň mekdep okuwçylary mynasyp boldy.
