Awazada DÇBÖBD-niň ýurtlarynyň durnukly ösüşinde sanly tehnologiýalaryň orny baradaky meseleler ara alnyp maslahatlaşyldy
Deňze çykalgasy bolmadyk ösüp barýan döwletler boýunça BMG-niň üçünji Maslahatynyň çäklerinde geçirilýän Raýatlyk jemgyýetiniň forumy tematiki mejlisler görnüşinde öz işini dowam etdi. TDH agentliginiň habar berşi ýaly, esasy üns «Sanly ykdysadyýet, innowasiýalar we durnukly ösüş» mejlisine bagyşlanyp, oňa gatnaşyjylar çalt ösýän tehnologiýalar döwründe inklýuziw we durnukly ösüşe ýetmekde sanly özgertmäniň ähmiýetini ara alyp maslahatlaşdylar.
Bilermenler we döwlet wekilleri ähli raýatlar üçin sanly tehnologiýalara deň derejede elýeterliligi üpjün etmegiň, degişli infragurluşy ösdürmegiň hem-de sanly ulgamlarda howpsuzlygy ýokarlandyrmagyň zerurlygyny belläp geçdiler. Innowasiýa ekoulgamlaryny goldamak meselelerine aýratyn üns berildi — bu startap telekeçiligini höweslendirmäge we öňdebaryjy tehnologiýalaryň ornaşdyrylmagyna şert döredýär. Netijede, öndürijilik ýokarlanýar we bu hyzmatlaryň hilini gowulandyrmaga itergi berýär.
Forumda şeýle hem Awaza hereket ediş maksatnamasyny durmuşa geçirmekde emeli aň we blokçeýn ýaly özgertme tehnologiýalaryň ulanylmagy ýaly mümkinçilikler gözden geçirildi. Bu maksatnama DÇBÖBD-niň ýurtlarynyň geografik ýagdaýy bilen bagly infragurluş boýunça päsgelçilikleri aradan aýyrmaga, döwlet dolandyryşynyň netijeliligini ýokarlandyrmaga, bilim, saglygy goraýyş hyzmatlaryna elýeterliligi gowulandyrmaga, şeýle hem logistika we söwda işlerini ýeňilleşdirmäge gönükdirilendir.
Bu jähtde Türkmenistan tarapyndan ileri tutulýan wezipeleriň biri hökmünde sanly we ykjam hyzmatlara ählumumy elýeterliligi üpjün etmek görkezildi. Ýurtda internet bilen üpjünçiligi giňeltmek we hyzmatlaryň hili bilen görnüşini artdyrmak maksady bilen, döwrebap aragatnaşyk ulgamyny döretmek boýunça uly möçberli taslamalar amala aşyrylýar. Bu çemeleşme durnukly ösüşi üpjün etmäge hem-de deňze çykalgasy bolmadyk ýurtlaryň dünýä ykdysadyýetine goşulyşmagyna itergi berýär.
