Eko­lo­gi­ýa aba­dan­çy­ly­gy – döw­rüň ta­la­by

Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň ýolbaşçylygynda ýurdumyzda tebigaty goramak, ekologiýa abadançylygyny üpjün etmek, tebigy baýlyklardan rejeli peýdalanmak döwlet syýasatynyň möhüm ugurlarynyň biri hökmünde öňe sürülýär. Ekologiýa medeniýetiniň ýokarlandyrylmagyna, tebigaty geljekki nesillere arassa ýagdaýda geçirmek meselesine aýratyn üns berilýär.

Ýurdumyzyň ähli künjeklerinde tokaý zolaklaryny döretmek, ösümlik we haýwanat dünýäsini gorap saklamak hem-de baýlaşdyrmak boýunça giň möçberli işler durmuşa geçirilýär. Şu ugurda her ýyl ýaz we güýz pasyllarynda geçirilýän ählihalk bag ekmek dabaralary aýratyn ähmiýete eýedir. 2021–2025-nji ýyllar üçin Milli tokaý maksatnamasynyň çäklerinde şu ýylyň hasabyna 3 million nahal oturdyldy.

Türkmenistanda tebigaty goramak bilen baglanyşykly hukuk binýady hem yzygiderli kämilleşdirilýär. “Tebigaty goramak hakynda” we “Ekologiýa howpsuzlygy hakynda” kanunlar daşky gurşawy goramak işiniň hukuk, ykdysady we guramaçylyk esaslaryny berkidýär.

Şeýle hem ýurdumyz halkara derejesinde ekologiýa diplomatiýasyny üstünlikli alyp barýar. Türkmenistan Birleşen Milletler Guramasynyň ýokary derejeli maslahatlarynda daşky gurşaw, howanyň üýtgemegi we ekologiýa meseleleri bilen baglanyşykly möhüm başlangyçlary öňe sürýär. BMG-niň 78-nji sessiýasynda hormatly Prezidentimiziň çykyşynda Merkezi Aziýadaky ekologiýa meseleleriniň çözgüdine aýratyn üns bermegiň zerurdygy nygtaldy.

Umuman, ýurdumyzda ekologiýa abadançylygyny üpjün etmek, daşky gurşawy goramak, ýaşyl zolaklary döretmek hem-de durnukly ösüş maksatlaryna ýetmek boýunça alnyp barylýan işler halkara derejesinde hem ýokary baha alýar.