OpenAI çip öndürijiler bilen hyzmatdaşlygyny giňeldýär
ChatGPT ulgamyny döreden OpenAI kompaniýasy, dünýäde emeli aň üçin grafiki prosessorlaryň iň uly üpjün edijisi bolan Nvidia bilen 100 milliard dollarlyk şertnama baglaşan soň, çip öndüriji AMD bilen hem täze hyzmatdaşlyk şertnamasyny baglaşdy.
Bu täze ylalaşyk, OpenAI kompaniýasynyň enjamlary diňe bir Nvidiadan däl-de, dürli çeşmelerden almak isleginiň bardygyny we Nvidiaýa bolan garaşlylygyny azaltmak isleýändigini görkezýär.
OpenAI, 2026-njy ýylyň ikinji ýarymynda AMD çiplerini ulanmagy meýilleşdirýär.
Täze çipler Tehas, Nýu-Meksiko, Ogayo ştatlarynda we Orta Günbatar Amerikanyň ady aýdylmadyk käbir ştatyndaky bar bolan maglumat merkezlerinden ayrylykda guruljak täze merkezlerde peýdalanylar.
AMD, häzirki wagtda bazarda öňdeligi saklaýan Nvidia bilen bäsleşip, emeli aň infrastukturasy bazarynda paý almak isleýän birnäçe kompaniýanyň biridir.
Emeli aň çip bazary örän çalt ösýär we ChatGPT ýaly modelleri işledýän ýokary hasaplaýyş kuwwatyna bolan isleg dowam edýär.
OpenAI öz modelleriniň we infrastrukturasynyň giňeldilmegini üpjün etmek üçin köp üpjün edijili strategiýa geçýär.
Şol bir wagtda, AMD hem bäsdeşligi güýçli bazarda öz ornuny berkitmäge we emeli aň ulgamynda Nvidia üçin hakyky alternatiwa öwrülmäge mümkinçilik alýar.
AMD bilen baglaşylan bu şertnama, emeli aň tehnologiýalarynyň nähili çalt ösýändigini we bu ugurda işleýän kompaniýalar üçin hasaplaýyş infrastrukturasynyň nähili möhüm bolandygyny görkezýär. OpenAI bolsa öňüni alyjy ädimler bilen tehnologiýa taýdan özbaşdaklygyny güýçlendirýär we giňelmegiň indiki tapgyryna taýýarlyk görýär.
