Samsung 2 nm önümçiligine geçýär — kompaniýa 1,8 milliard dollarlyk täze enjamlary satyn alýar
Dünýäniň öňdebaryjy tehnologik kompaniýalarynyň biri bolan Samsung Electronics mikroçip önümçiliginde täze eýýama gadam goýýar. Kompaniýa 2 nanometrli (nm) önümçilik prosesine geçmek üçin iň döwrebap enjamlary satyn alýar.
Kompaniýanyň maglumatyna görä, EUV (ekstremal ultramelewşe litografiýa) ulgamynda işleýän täze önümçilik enjamlarynyň bahasy her biri üçin 210 million dollardan 400 million dollara çenli bolýar. Umuman, bu taslama boýunça maýa goýumlaryň jemi bahasy 1,8 milliard dollara ýetýär.
Täze enjamlaryň arasynda High NA EUV atly ýokary takyklykly litografiýa ulgamlary hem bar. Bu tehnologiýa takyklygy 1,7 esse, tranzistorlaryň dykyzlygyny 3 esse artdyrýar hem-de optiki takyklygy 40% ýokarlandyrýar.
Samsung kompaniýasy bäş sany adaty EUV enjamyny ornaşdyryp, maglumat saklaýyş bölüminiň özbaşdak önümçilik liniýasyny döretmegi meýilleşdirýär. Öň bu bölüm Pýonhekede ýerleşýän plastin önümçilik zawody bilen umumy enjamlary ulanýardy.
Şeýle-de kompaniýa iki sany High NA EUV toplumyny satyn alýar. Olaryň biri 2025-nji ýylyň ahyrynda ýa-da 2026-njy ýylyň başynda işe giriziler. Bir enjam Hwaseongdaky zawodda, beýlekisi bolsa, ähtimal, Teýlorda ýerleşýän plastin önümçilik merkezinde ýerleşdiriler.
Bu ädim Samsungyň mikroçip öndürijilik mümkinçiliklerini ep-esli giňelder we kompaniýanyň TSMC bilen arasyndaky bäsleşigi güýçlendirer diýip, hünärmenler belleýärler.
