Selfi, tiktok we blogerleriň täze eýesi — iPhone 17 Pro dünýäde öňe saýlandy
Meşhur “DxOMark” selfi kameralarynyň täze reýtingine görä, “Apple”-niň iPhone 17 Pro modeli dünýäde iň gowy öň kamera hökmünde ykrar edildi. Ol bu derejä “Honor” we “Google” kompaniýalarynyň öňdebaryjy modellerini geçip ýetmek arkaly ýetdi.
Täze iPhone 17 hatary — esasy modelden başlap “Pro Max” görnüşine çenli — bu ýyl 18 megapiksel ýygylykdaky täze öň kamera bilen üpjün edildi. D/1,9 diafragmaly hem-de inowasion kwadrat görnüşli sensor bilen enjamlaşdyrylan bu kamera, öňki 12 MP-lik iPhone 16 Pro modulynyň ornuny tutdy. Täze ulgam telefona fiziki öwürmä gerek bolmazdan portret we giň görnüşli surata düşürmäni mümkin edýär.
“DxOMark”-yň maglumatyna görä, iPhone 17 Pro 154 bal toplap, öňdebaryjy orun eýeledi. Ony yzysüre iPhone 16 Pro we Honor Magic6 Pro (151 bal), iPhone 15 Pro (149 bal) we Google Pixel 9 Pro XL (148 bal) gelýär.
Täzelenme diňe enjamlaýyn bölege däl-de, eýsem “Apple”-nyň surat işlemek algoritmleriniň optimizasiýasyna-da esaslanýar. Netijede öň kamera has giň dinamiki diapazona, has doýgun reňklere we has takyk ýagtylyk deňagramlylygyna eýe boldy. Şol bir wagtyň özünde, “Apple”-a mahsus ýyly deri reňkleri saklanyp galdy.
Täze kamera 20 mm fokus aralygy bilen (öňki 23 mm bilen deňeşdirilende) surata düşýän adamlary has giň meýdanda ýerleşdirýär. Şeýle-de bolsa, pes ýagtylykda surata düşürilen selfilerde azajyk seslenme saklanyp galýar, şeýle hem hereket wagtynda stabilizasiýa käte bozulyp bilýär.
