Stewiýanyň ekstrakty aşgazanasty mäziň rak öýjüjelerini ýok edip bilýär
Ýaponiýanyň Hiroşima uniwersitetiniň alymlary tarapyndan geçirilen täze ylmy barlag stewiýa ösümliginden alnan ekstraktlaryň aşgazanasty mäziň rak öýjüjelerine garşy täsir edip bilýändigini ýüze çykardy. Has anyk aýdanyňda, süýt turşylyk bakteriýalary bilen işlenilen stewiýa ekstrakty (fermentasiýa edilen stewiýa ekstrakty – FSLE) rak öýjüjeleriniň ösmegini güýçli basyp bilýär we şol bir wagtda sagdyn öýjüjelere diýen ýaly zyýan ýetirmeýär.
Bu ylmy işiň netijeleri “International Journal of Molecular Sciences (IJMS)” atly abraýly žurnalda çap edildi.
Barlagyň gurluşy we netijeleri
Alymlar Lactobacillus plantarum SN13T atly süýt turşy bakteriýasynyň kömegi bilen stewiýa ýapragynyň ekstraktlaryny fermentasiýa etdiler. Laboratoriýa şertlerinde geçirilen synaglarda, şeýle işlenilen ekstraktlaryň konsentrasiýasy ýokary bolan görnüşi PANC-1 atly aşgazanasty mäziň rak öýjüjeleriniň ösüşini adaty stewiýa ekstraktyndan has güýçli basypdyr.
Mundan başga-da, bu serişdäniň adam böwrek öýjüjelerine (HEK-293) garşy toksik täsiriniň örän pes bolandygy bellenilýär, ýagny sagdyn öýjüjelere zyýany az.
Täsirli birleşme: CAME
Barlaglaryň dowamynda esasy rak garşy täsir edýän birleşmäniň hlorogen kislotasynyň metil efiri (CAME) bolandygy anyklanyldy. Şu birleşmäniň fermentasiýa prosesi wagtyndaky artmagy, ekstraktyň biologiki täsirini güýçlendirýär.
Ragyň öňüni almakdaky ähmiýeti
Alymlar belleýärler, aşgazanasty mäziň raky lukmançylykda iň kyn bejerilýän we iň agresiw rak görnüşleriniň biri bolup durýar. Bu keselli näsaglaryň 5 ýyllyk sag galma derejesi 10%-den hem pesdir. Şonuň üçin, tebigy çeşmeli täze birleşmeleriň tapylmagy we öwrenilmegi bu ugurda möhüm ädimleriň biridir.
Geljekki tapgyrlary: Haýwanlar bilen synag
Gözlegiň indiki tapgyrynda alymlar derman serişdesiniň dürli dozalarynyň haýwanlarda nähili täsir edýändigini öwrenmegi maksat edinýärler. Bu barlaglar arkaly iň täsirli we howpsuz bejeriş dozasyny kesgitlemek meýilleşdirilýär.
