Ýaponiýada palçykdan berk jaý gurmagy başardylar
Popular Science žurnalynyň habar bermegine görä, Ýaponiýanyň gurluşyk kompaniýasy Lib Work, topragyň, ýumşadylan ýelimli maddalaryň (ýagny, kalsiý esasly garyndy – ýagny, ýalkym / ýasy) we tebigy süýümleriň garyndysyndan 3D printer arkaly çap edilýän täze görnüşli jaýlaryň satuwyna taýýarlanýandygyny mälim etdi.
Adatça, 3D tehnologiýasy arkaly gurlan jaýlar plastmassadan ýa-da sement esasly materiallardan ýasalýar. Ýöne ýapon inženerleri täze çemeleşme hödürläp, diňe tebigy serişdeleri ulanmagy teklip etdiler. Täze gurluşyk materialy hökmünde topraga ýelim beriji hökmünde ýasy (kalsiý garyndysy) goşulýar, üstesine-de, ösümlik süýümleri bilen berkidilýär. Lib Work-yň maglumatyna görä, bu garyndydan ýasalan jaýlar sementden gurlan öňki modeller bilen deňeşdirilende bäş esse berk bolýar.
Gurluşyk işleriniň özi hem täzeçil usul bilen ýerine ýetirilýär: 3D printer göni gurluşyk meýdançasynda oturdylýar we jaýyň karkasyny (esasy gurluşyny) çap edýär. Soňra gurluşykçylar gapylary, penjireleri, sanitariýa enjamlaryny we inženerçilik ulgamlaryny ornaşdyrýarlar. Täze jaýlar şeýle hem gün panelleri we energiýa saklaýjy akkumulýatorlar bilen enjamlaşdyrylýar – bu hem olaryň energiýa taýdan öz-özüni üpjün etmegine mümkinçilik berýär.
Synag gurluşygynyň dowamynda jaýyň diwarlaryna çyglylyk derejesini we ýylylyk geçirijiligini ölçeýän datçikler ýerleşdirildi. Jaýlar ulanyşa berilenden soň, hünärmenler gurluşygyň ýagdaýyny yzarlamagy dowam ederler – mümkin bolan zeperler ýa-da kadadan çykmalar yzygiderli gözegçilikde saklanar.
Kompaniýa bu görnüşli jaýlaryň satuwyna 2025-nji ýylyň awgust aýynda başlamagy meýilleşdirýär. Öndürijileriň bellemegine görä, ýerli we tebigy materiallary ulanmak hem-de ýokary energiýa talap edýän materiallardan ýüz öwürmek bu tehnologiýany diňe bir ekologiýa taýdan durnukly etmän, eýsem, giňden ornaşdyrmaga hem mümkinçilik berýär.
