Old Trafforddaky ýeňiş: Mançester Ýunaýted Ýewropa Ligasynyň finalyna bat alýar
UEFA Ýewropa Ligasynyň 2024/2025 finalyna çykmak ugrunda Ruben Amorimiň tälimçilik edýän Angliýanyň Mançester Ýunaýted topary öz meýdançasynda Ispaniýanyň Atletika Bilbao toparyny kabul etdi. Mançester şäherinde ýerleşýän Old Trafford stadionynda geçirilýän duşuşyga Germaniýa döwletinden bolan Daniel Siebert eminlik etdi. Geçen duşuşykda 3:0 hasaby bilen ýeňilen Atletika Bilbao toparynyň baş tälimçisi Ernesto Walwerde 4-2-3-1 taktikasyny saýlap aldy. Oýnuň 31-nji minudynda Atletika Bilbaonyň düzüminde çykyş edýän 23-nji belgili ýarymgoragçy 21 ýaşly ispaniýaly Mikel Hauregizar hasaby açmagy başardy. Oýnuň 72-nji minudynda mançestirliler hasaby deňlemegi başardylar. Leny Ýoronyň ýardam pasyndan 7-nji belgide çykyş edýän Meýson Maunt hasaby deňledi. Oýnuñ 80-nji minudynda Bruno Fernandesiň ýardamlygynda Kazemiro hasaby 2:1 ýetirdi. 85-nji minutda Rasmus Hoýlun Amad Diallonyň ýardam pasyndan peýdalanyp, hasaby artdyrdy. 90+1 minutda Meýson Maunt duşuşykda ikinji goluny geçirip, hasaby 4:1 ýetirdi (umumy hasap 7:1). UEFA Ýewropa Ligasynyň kubogyny almak üçin mançestirliler londonly Tottenhem topary bilen bäsleşer. Ýewropa Ligasynyň 2024/2025 final oýuny 2025-nji ýylyň 21-nji maýynda Ispaniýanyň Bilbao şäherindäki San-Mames stadionynda geçiriler.
